Мўжтабо Хоманаий тирикми? Унинг нега кўриниш бермаётгани тушунтирилди
АҚШ ва Исроилнинг Эронга қарши кенг кўламли ҳарбий босқини ва собиқ раҳбар Али Хоманаийнинг ўлимидан сўнг, мамлакатнинг янги олий раҳбари Мўжтабо Хоманаий бутунлай кўздан ғойиб бўлган эди.
Эроннинг олий раҳбари Мўжтабо Хоманаий АҚШ ва Исроилнинг Эронга қарши ҳарбий босқини бошланганидан бери омма олдида кўринмади.
Эрон Ислом инқилоби қўриқчилари корпуси (ИИҚК) бош қўмондони маслаҳатчиси Муҳаммад Ризо Нағдийнинг айтишича, бунга ягона сабаб хавфсизлик масаласи ҳисобланади.
Нағдий бу ҳақда «PBS» телеканалига берган интервюсида маълум қилди. У журналистнинг Хоманаий нега жамоатчилик олдига чиқмаётгани ҳақидаги саволига «бу унинг стратегияси» эканини айтди.
«Табиийки, бу хавфсизлик сабабли. Албатта, бошқа сабаб йўқ», — деди ИИҚК маслаҳатчиси.
Унинг таъкидлашича, «Эроннинг душманлари жиноятчи ва қонунга бўйсунмайди».
Нағдий у билан учрашганми?
Нағдийдан Мўжтабо Хоманаий билан шахсан учрашган-учрашмагани ҳам сўралган. Бироқ ИИҚК вакили бу саволга аниқ жавоб беришдан ўзини олиб қочган.
Мужтабо Хоманаий Америка Қўшма Штатлари ва Исроилнинг Эронга қарши ҳарбий операцияси бошланганидан бери бирор марта ҳам омма олдида чиқиш қилмади. Айнан шу операция давомида унинг отаси, Ислом Республикасининг аввалги олий раҳбари Али Хоманаий ҳалок бўлган эди. Теҳрон Мужтабо Хоманаийнинг саломатлигига ҳеч қандай хавф таҳдид солмаётганини бир неча бор таъкидлаган.
