Москвадан яна бир «шахсий фикр»: энди Дугин дегани Ўзбекистоннинг суверенитетига таҳдид билан чиқди

Кремл пропагандачиси, телебошловчи Владимир Соловёвнинг «Марказий Осиёга нисбатан «СВО» бошлаш» ҳақидаги таҳдидли чиқишидан сўнг ҳовурлар босилмай, «Рус дунёси»нинг мафкурачиси Александр Дугин «...биз суверен Арманистон ёки суверен Гуржистон ёки суверен Озарбайжон, суверен Қозоғистон, суверен Ўзбекистон, Тожикистон ва Қирғизистоннинг мавжудлигига рози бўла олмаймиз...» деб чиқиш қилди.

«Ёки улар бизнинг ягона иттифоқимиз таркибига киради, ёки АҚШ ва Европа Иттифоқи учун [бизга қарши] плацдармга айланади. Ҳаммаси тугади. Суверенитет якунланди. Миллий давлатлар — ўтмиш», — деди Дугин.

Кремл пропагандачиларининг кетма-кет чиқишлари борасида журналист Илёс Сафаров шундай ёзади:

«Россиялик пропагандачиларнинг кетма-кет чиқишлари тасодиф эмас, бу индивидуал фикр ҳам эмас — бу жуда аниқ хавфли, мафкуравий сигнал. Кеча Соловёвнинг Марказий Осиёда «махсус ҳарбий операция» ўтказиш ҳақидаги чақириғи, бугун эса Дугин берган мана бу баёнот Россия сиёсий доираларида постимпериал тафаккур ҳануз тирик эканини яна бир бор исботламоқда.

Бундай шароитда «содда, юмшоқ дипломатия» ишламайди, чунки куч сиёсатини тарғиб қилаётган томон фақат кучни ва қатъий позицияни тан олади. Озарбойжон мисолида буни кўрдик.

Ташқи ишлар вазирлиги ва мамлакат раҳбарияти тушуниши керак: суверенитетимизнинг очиқ инкор этилишини жавобсиз қолдириш хавфсизлик вакуумини юзага келтиради. Доимий сукут — бетарафлик ёки босиқлик эмас, балки заифлик сифатида қабул қилинади.

Шу сабаб, биринчи ва энг табиий жавоб сифатида бундай чақириқлар билан чиққан шахсларни «персона нон грата» деб эълон қилишни бошланг. Ортиқ кутиш мумкин эмас.

Иккинчи босқичда эса уруш ва босқинчилик мафкурасини тарғиб қилаётган Россия телеканалларини Ўзбекистон ҳудудида блоклаш каби ахборот хавфсизлиги ричагларини ишга солайлик. Агар бу аниқ чоралар ҳам самара бермаса, кейинги босқичда Марказий Осиё давлатларининг бирлашган, жамоавий ва очиқ сиёсий жавоби кун тартибига чиқиши лозим. Юмшоқ дипломатия эмас, онгли, принцwипиал ва изчил позиция — минтақавий барқарорликнинг ягона кафолати бўла олади».

Эслатиб ўтамиз, Украинага нисбатан мана шундай фикрий ҳужумлари туфайли 2022 йилнинг августида Дугинга нисбатан Украина махсус хизматлари томонидан суиқасд уюштирилган эди. Бироқ суиқасд юштирилган автомашинада унинг ўзи бўлмагани сабабли, рулни бошқараётган қизи Даря Дугина ҳалок бўлган эди.