Мутахассислар нархи 200 долларгача бўлган энг яхши 5 смартфонни аниқлади
Gizchina нашри 2025 йил учун 200 долларгача бўлган энг кучли ва тежамкор Android-смартфонлар рейтингини эълон қилди. Рўйхатга Motorola, Samsung, Nothing ва DOOGEE каби брендлар кирди.
Бугун 200 долларгача бўлган нархда сифатли смартфон топиш анча осонлашган. Бюджет сегменти тез суръатда ривожланмоқда ва 2025 йилда у замонавий дизайн, тезкор экран ва узоқ муддатли қўллаб-қувватлов билан ажралиб турадиган моделлар билан тўла.
Gizchina портали мутахассислари нархи 200 долларгача бўлган энг яхши Android-смартфонлар рўйхатини янгилади. Рейтингда биринчи ўринни Moto G (2025) модели эгаллади. Унда 6,7 дюймлик Full HD+ дисплей, 120 Гц пирпираш частотаси, MediaTek процессори ва икки кунгача автоном ишлаш имкони мавжуд. Шунингдек, NFC қўллаб-қувватланади ва тизим «тоза» Android асосида ишлайди.
Иккинчи ўринни Samsung Galaxy A16 5G эгаллади — 5G технологиясини энг арзон нархда таклиф этувчи моделлардан бири. У Super AMOLED дисплейга ва олти йиллик Android янгиланишларига эга.
Учинчи ўринда CMF Phone 1 — Nothing компаниясининг суббренди ишлаб чиқарган смартфон. У алмаштириладиган орқа панеллар ва ёрқин ранг вариантлари билан ажралиб туради. Dimensity 7300 чипсети уни ўз тоифасидаги энг кучли қурилмалардан бирига айлантиради.
Тўртинчи ўриндаги DOOGEE Blade 10 эса барқарорлиги билан ажралиб туради. У MIL-STD-810H ҳарбий стандарти бўйича муҳофазаланган корпусга эга бўлиб, сув ва баландликдан тушишга чидамли. Унинг батареяси икки кунгача етади.
Бешинчи ўринда Moto G 5G (2024) жой олди. Гарчи модел бир йиллик бўлса-да, ҳануз 200 долларгача бўлган энг функционал смартфонлардан бири ҳисобланади. У Snapdragon 4 Gen 1 чипсетига, 6,6 дюймлик 120 Гц экранга ва 5G қўллаб-қувватловига эга.
