Ўзбекистон мустақиллигининг 35 йиллиги учун эсдалик нишони таъсис этилди

Президент фармони билан «Ўзбекистон Республикаси мустақиллигининг 35 йиллиги» эсдалик нишони таъсис этилди. Бу ҳақда президент матбуот хизмати хабар берди.

Фармонда таъкидланишича, Ўзбекистон мустақиллигининг 35 йиллигини муносиб нишонлаш учун кенг қамровли тайёргарлик ишлари олиб борилмоқда. Ҳужжатда мустақиллик Янги Ўзбекистон тараққиётининг асоси ва келажак авлодларга етказилиши лозим бўлган муқаддас қадрият сифатида эътироф этилган.

Фармонга кўра, эсдалик нишони мамлакат мустақиллигини мустаҳкамлаш, унинг иқтисодий салоҳияти ва халқаро нуфузини оширишга муносиб ҳисса қўшган фуқароларга топширилади.

Шунингдек, кўп йиллик фидокорона меҳнати, юқори касбий маҳорати ҳамда жамоатчилик ҳаётидаги фаол иштироки билан эл-юрт ҳурматига сазовор бўлган ватандошлар ҳам ушбу мукофот билан тақдирланиши мумкин.

Президент фармони билан эсдалик нишонининг низоми ва тавсифи ҳам тасдиқланган.

Ҳужжатга кўра, Вазирлар Маҳкамаси бир ой муддат ичида эсдалик нишонлари ва уларнинг гувоҳномаларини белгиланган тартибда тайёрлаш чораларини кўриши лозим.

Фармон ижросини назорат қилиш Бош вазир Абдулла Арипов ҳамда Президент Администрацияси раҳбари Саида Мирзиёева зиммасига юклатилган.