Ўзбекистон мустақиллигининг 35 йиллигига бағишланган олтин ва кумуш эсдалик тангалари сотувга чиқарилди
Мазкур эсдалик тангалари 999,9 асиллик даражасидаги соф олтин ва соф кумушдан тайёрланган бўлиб, уларнинг ҳар бирининг вазни 31,1 граммни ташкил этади.
© markaziy bankЎзбекистоннинг озод ва суверен давлат сифатида босиб ўтган 35 йиллик йўлига бағишланган махсус эсдалик тангалари 28 августдан бошлаб мамлакатдаги тижорат банклари ва уларнинг филиалларида сотувга чиқарилди. Бу ҳақда Марказий банк хабар берди.
Асиллик даражаси ва дизайн
Мазкур эсдалик тангалари 999,9 асиллик даражасидаги соф олтин ва соф кумушдан тайёрланган бўлиб, уларнинг ҳар бирининг вазни 31,1 граммни ташкил этади.
«Тангаларда Ўзбекистон Республикаси давлат рамзлари тимсоллари тасвирланган», — дейилади хабарда.
Маълум қилинишича, ушбу тангаларни уч доналик коллекция тўпламида ёки алоҳида ҳолда харид қилиш имконияти яратилган.
Мустақиллик тарихидан қадрли эсдалик сифатида зарб этилган мазкур учта тангадан иборат коллекцияда халқимизнинг тарихий хотираси, бугунги бунёдкорлиги ва келажакка ишончи мужассамлашгани таъкидланади.
Чекланган тираж ва нархлар
Дастлабки босқичда сотувга чиқарилган эсдалик тангалари чекланган тиражга эга бўлиб, кўрсаткичлар қуйидагича тақсимланган:
• Олтин тангалар — 450 дона;
• Кумуш тангалар — 800 дона.
Сотувдаги тангаларнинг нархлари ҳамда уларнинг тижорат банкларидаги мавжудлик ҳолати бўйича янгиланган маълумотлар Марказий банкнинг расмий веб-сайтида ҳар куни эълон қилиб борилиши қайд этилган.
