Ўзбекистонда 5 граммли олтин қуймаси 8 миллион сўмдан тушди
28 октябр куни олтин қуймалари нархи кескин арзонлади — 5 граммли қуйма нархи бир кунда 206 минг сўмга тушиб, 7,96 миллион сўмни ташкил этди. Бу сўнгги уч ҳафтадаги энг паст кўрсаткич ҳисобланади.
Ўзбекистон Марказий банки маълумотларига кўра, 28 октябр куни мамлакатда олтин қуймалари нархи сезиларли даражада пасайди. Бир грамм олтин нархи 1 593 360 сўмни ташкил этди, бу эса бир кун олдинги кўрсаткичга нисбатан 2,5 фоизга арзон.
Энг кўп сотиб олинадиган 5 граммли олтин қуймаси нархи бир кунда 206 минг сўмга пасайиб, 7 миллион 967 минг сўмни ташкил этди. Бу нарх 9 октябрдан буён илк марта 8 миллион сўмдан пастга тушди.
Ҳозирги пайтда олтин қуймаларининг расмий нархи қуйидагича белгиланган:
5 грамм — 7 млн 967 минг сўм,
10 грамм — 15 млн 934 минг сўм,
20 грамм — 31 млн 867 минг сўм,
50 грамм — 79 млн 668 минг сўм,
100 грамм — 159 млн 336 минг сўм.
17 октябр куни Ўзбекистонда олтин қуймалари нархи 44 марта кетма-кет ошиб, тарихий рекордни янгилаган эди. Аммо 20 октябрдан бошлаб жаҳон бозорларидаги пастлаш тенденцияси таъсирида маҳаллий нарх ҳам пасайишга юз тутган.
Халқаро савдо майдонларида ҳам 21 октябр савдоларида олтин нархи 6 фоизга пасайиб, бир трой унсияси учун 4100 долларни ташкил этди. Бу 2013 йилдан буён кузатилган энг катта бир кунлик пасайиш бўлган эди.
