Ўзбекистонда хориждаги ҳарбий ҳаракатларда иштирок этиш бўйича 2022 йилдан бери 338 та жиноят иши қўзғатилган
2022 йилда хориждаги ҳарбий ҳаракатларда қатнашиш бўйича 19 та жиноят иши қўзғатилган бўлса, 2023 йилда 68 та, 2024 йилда 112 та ва 2025 йилда 139 та ҳолат қайд этилган.
Ўзбекистонда сўнгги тўрт йил ичида чет элдаги ҳарбий ҳаракатларда иштирок этганлик бўйича қўзғатилган жиноят ишлари сони кескин ошгани маълум қилинди. «Узоқдан изланган бахт» ҳужжатли фильмида келтирилган расмий маълумотларга кўра, 2022–2025 йиллар давомида Жиноят кодексининг 154-моддаси (ёлланиш) билан боғлиқ 338 та ҳолат қайд этилган.
Маълумотга кўра, 2022 йилда ушбу модда бўйича 19 та жиноят иши қўзғатилган бўлса, 2023 йилда 68 та, 2024 йилда 112 та ва 2025 йилда 139 та ҳолат қайд этилган. Мутасаддилар ушбу динамикани вазиятнинг жиддийлашуви ва хавфсизликка таҳдидлар кучайиб бораётгани билан изоҳлайди.
Жиноят кодексининг тегишли моддасига мувофиқ, ёлланишда айбдор деб топилган шахслар беш йилдан ўн йилгача озодликдан маҳрум этилиши мумкин. Агар шахслар бошқаларни ёллаш, ўқитиш, молиялаштириш ёки моддий ёрдам кўрсатган бўлса, шунингдек улардан хориждаги ҳарбий ҳаракатларда фойдаланиш ҳолати аниқланса, жазо муддати етти йилдан ўн икки йилгача ошади. Бу қатъий жазолар давлатнинг ёлланма жангарилар оқибатларини олдини олишга қаратилган сиёсатидан дарак беради.
Эслатиб ўтамиз, «Хочу жит» (яшашни истайман) ташкилоти Украинадаги урушда Россия армияси сафида жанг қилган, ҳалок бўлган ёки бедарак йўқолган ўзбекистонлик фуқароларнинг янги рўйхатини эълон қилган эди.
