Ўзбекистонликлар Korzinka, Olma ва Havas’да чекларни кўпроқ рўйхатдан ўтказмоқда
Январдан июнгача Soliq иловасида энг кўп чек рўйхатдан ўтказилган ТОП-20 компания бўйича кўрсаткич 14,4 фоизга ошди. Лекин ўсиш бозор бўйлаб бир текис тарқалмаган: Korzinka, Olma ва Havas’да чеклар жами 28,7 фоизга кўпайган, ТОП-20нинг қолган қисмида эса 11,1 фоизга қисқарган.
Солиқ қўмитаси маълумотларига кўра, 2026 йил январида TOP-20 компания бўйича Солиқ мобил иловасида 14,56 млн дона харид чеки рўйхатдан ўтказилган. Июн ойида бу кўрсаткич 16,66 млн донага етган. Мутлақ ўсиш — қарийб 2,1 млн дона.
Июн январдан бир кун қисқа бўлганини ҳисобга олсак, кунлик ўртача кўрсаткичдаги ўсиш янада юқори — 18,2 фоизни ташкил этади. Аммо бу рақамлар барча савдо чеклари ёки компанияларнинг тушумини эмас, айнан Солиқ иловасида рўйхатдан ўтказилган чеклар фаоллигини кўрсатади.
Учлик ажралиб қолмоқда
Январда Korzinka, Havas ва Olma бўйича жами 9,33 млн чек рўйхатдан ўтказилган эди. Июн ойида учликнинг натижаси 12,01 млн донага етди. Ўсиш 2,68 млн дона ёки 28,7 фоизни ташкил этди.
Бу ерда муҳим тафовут бор: ТОП-20 бўйича умумий ўсиш 2,1 млн дона бўлган, учта етакчи тармоқнинг ўзи эса 2,68 млн дона қўшимча чек берган. Демак, учлик нафақат барча ўсишни таъминлаган, балки рўйхатнинг қолган қисмидаги 580 мингдан ортиқ пасайишни ҳам қоплаган.
Натижада Korzinka, Olma ва Havas’нинг ТОП-20даги улуши 64,1 фоиздан 72,1 фоизга кўтарилди. Атиги беш ойда концентрация 8 фоиз бандга кучайган.
Энг катта сакраш Olma супермаркетида кузатилди. Тармоқ бўйича рўйхатдан ўтказилган чеклар 1,5 млн донадан 2,79 млн донага етиб, 85,7 фоизга ошган. Olma шу ҳисобдан Havas’ни ортда қолдириб, учинчи ўриндан иккинчи ўринга чиқди.
Korzinka етакчиликни сақлаб қолди: чеклар сони 958,4 минг донага ёки 16,5 фоизга кўпайиб, 6,75 млн донага етди. Havas’да эса ўсиш 431,6 минг дона ёки 21,3 фоизни ташкил қилган.
Korzinka’нинг натижаси тармоқнинг сўнгги йиллардаги кенгайиши фонида мантиқий кўринади. Vaqt.uz аввал ёзганидек, компания дўконлари сони 3,5 йил ичида 2,5 баробар кўпайиб, 250 тадан ошган. Тармоқ 2025 йилда 12 трлн сўмдан ортиқ даромад қилган, бироқ йилни 245 млрд сўмдан зиёд зарар билан якунлаган.
Фаст-фуд ўсди, ёқилғи операторлари кескин пасайди
Ўсиш фақат супермаркетларда эмас. EVOS’да рўйхатдан ўтказилган чеклар 29,6 фоизга, Oqtepa Lavash’да 18,8 фоизга, KFC’да 8,6 фоизга ошган. Учта фаст-фуд тармоғининг умумий натижаси 814,9 мингдан 963,1 минг донага етди — ўсиш 18,2 фоиз.
Энг юқори нисбий ўсиш Намангандаги «Афсоналар водийси»да қайд этилди: чеклар сони 120,7 мингдан 359,5 минг донага, қарийб уч баробар ошган.
Аммо бундай ўсишга ёзги мавсум таъсир қилган. Ўтган йилнинг ёзида боғ орқали ойига ўртача 470 мингдан ортиқ чек рўйхатдан ўтказилган.
Ёқилғи операторларида эса тескари ҳолат кузатилган. UNG Petro’да чеклар 38,3 фоизга, SANEG’да 62 фоизга камайди. Икки компаниянинг жами кўрсаткичи 1,17 млн донадан 589,6 минг донага тушган — деярли 50 фоизлик пасайиш.
Бироқ бундан ёқилғи савдоси ҳам шунча қисқарган, деган хулоса чиқмайди. Инфографика фақат иловага киритилган чеклар сонини беради.
Умумий кешбэк ўсишининг 3,83 млрд сўми ёки 92,3 фоизи ТОП-20 таркибидаги алмашув ҳисобидан шаклланган. Январь рўйхатидаги Baraka Market, Assorti Market, bi1, OXYmed ва Magnum ўрнига июнда Big Pharm, Vaksina Med, Intran Servis, ASR & Co. ҳамда Osiyo Trade Biznes кирган.
Манба: Солиқ қўмитасининг 2026 йил январь ва июнь ойларига оид инфографикалари. Ҳисоб-китоблар муаллиф томонидан амалга оширилган. Маркетплейс орқали сотилган товарлар бўйича тақдим этилган чеклар қўмита рейтингига киритилмаган.
