Ўзбошимчалик билан эгалланган ерларни қонунийлаштириш тартиби соддалаштирилди
Президент Шавкат Мирзиёев томонидан имзоланган янги қонун ўзбошимчалик билан эгалланган ер участкалари ва уларда қурилган бино-иншоотларга бўлган ҳуқуқларни эътироф этиш тартибини янада соддалаштирди. Ҳужжатга кўра, аризаларни кўриб чиқиш муддати 150 кундан 50 кунгача қисқартирилди ҳамда фуқаролар учун янги имтиёзлар жорий этилди.
© sun'iy intelekt2026 йил 15 июнь куни Шавкат Мирзиёев «Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисида»ги қонунни имзолади.
Қонун ўзбошимчалик билан эгалланган ер участкалари ҳамда уларда қурилган бино ва иншоотларга нисбатан ҳуқуқларни эътироф этиш жараёнларини жадаллаштириш ва ягона, изчил тартибни таъминлашга қаратилган.
Қонунга кўра, қарздорлик миқдори БҲМнинг 30 бараваридан ошмаган кўчмас мулк объектларига нисбатан ҳуқуқларни эътироф этиш йўлга қўйилади. Қонунда белгиланган муддатлар амалдаги 150 кундан – 50 кунга қисқартирилди. 1 марталик тўловларнинг 50 фоизи 20 иш кунида тўлиқ тўланганда, унинг қолган қисмига чегирма берилади. Тўлаш имконияти бўлмаганда фуқарога солиқ инспекцияси билан шартнома тузиш орқали мазкур маблағни 1 йилдан 3 йилгача бўлиб тўлашга рухсат берилади.
Ортиқча эгалланган ер участкасига ҳуқуқни эътироф этиш механизми янада такомиллаштирилди. 2020 йил 1 январдан 2024 йил 1 июнга қадар ер участкаси учун оширилган ставкада ҳисобланган солиқлар жисмоний шахсларга қўлланилмаслиги белгиланди. Фуқароларнинг вақти ва маблағларини тежаш мақсадида шикоятларни судга қадар кўриб чиқиш механизми киритилди. Ер участкасининг қурилиши тақиқланган ҳудудга тушган қисмини чегириб ташлаган ҳолда унинг қолган қисмига нисбатан ҳуқуқларни эътироф этиш тартиби жорий этилади. Бино-иншоотлар хусусийлаштирилгани тўғрисидаги маълумотни тақдим этишга туман (шаҳар) ҳокимликлари ҳам масъул этиб белгиланди.
