Перу тарихида илк бор аёл киши президентлик сайловларида ғалаба қозонди
У сўнгги ўн йил ичида Перу президенти лавозимини эгаллаган тўққизинчи шахс бўлади.
Кейко Фухимори Перу президенти сайловларида кичик фарқ билан ғалаба қозонди ва мамлакат тарихидаги илк аёл раҳбарга айланади. Бу ҳақда «Bloomberg» агентлиги Перу сайлов комиссияси маълумотларига таяниб хабар берди.
7 июн куни бўлиб ўтган сайловнинг иккинчи босқичи натижаларига кўра, консерватив «Халқ кучи» партияси номзоди Кейко Фухимори сайловчиларнинг 50,14 фоиз овозини тўплади. Унинг асосий рақиби, сўлчи «Перу учун бирга» партияси раҳбари Роберто Санчес эса 49,87 фоиз овоз олди. Икки номзод ўртасидаги фарқ 49 641 та овозни ташкил қилди. Мазкур натижалар минглаб баҳсли бюллетенлар сайлов комиссияси томонидан узоқ вақт давомида таҳлил қилинганидан сўнг эълон қилинди.
Кейко Фухимори 28 июл куни беш йиллик муддатга ўз лавозимига киришади. У сўнгги ўн йил ичида Перу президенти лавозимини эгаллаган тўққизинчи шахс бўлади. Бунга қадар у 2011, 2016 ва 2021 йиллардаги президентлик сайловларида ҳам иштирок этган эди.
Апрел ойида конгрессга бўлиб ўтган сайловларда Фухиморининг партияси сенатдаги 60 ўриндан 22 тасини қўлга киритган. Бу эса президентга нисбатан импичмент бўйича ҳар қандай дастлабки уринишларни блоклаш учун етарли вакилликни таъминлайди.
Собиқ президент Алберто Фухиморининг сиёсий ўтмиши
Сайланган президентнинг отаси Алберто Фухимори 1990 йилдан 2000 йилгача Перуни бошқарган. Ўз бошқаруви даврида у конгрессни тарқатиб юбориш ва янги Конституцияни қабул қилишга эришиб, ўз ваколатларини кенгайтирган эди. У мамлакатдаги маоист ва марксист-ленинчи гуруҳларга қарши қуролли кураш олиб борган.
2000 йилда унга тегишли партия сафларида коррупцияга оид далиллар пайдо бўлгач, у мамлакатни тарк этган ва парламент қарори билан ҳокимиятдан четлатилган. 2005 йилда Чилида ҳибсга олиниб, 2007 йилда Перуга экстрадиция қилинган. 2009 йилда коррупция ва инсониятга қарши жиноятлари учун 25 йиллик қамоқ жазосига ҳукм қилинган.
2023 йилнинг 5 декабрида Перу Конституциявий суди уни зудлик билан озод қилиш тўғрисида қарор чиқарди ва 7 декабр куни у 16 йиллик қамоқдан сўнг озодликка чиқди. Алберто Фухимори 2024 йилнинг сентябрь ойида 86 ёшида саратон касаллигидан вафот этди.
