Президент бизнес ҳамжамиятини Тадбиркорлар куни билан табриклади

Шавкат Мирзиёев Хоразмда тадбиркорлар билан очиқ мулоқот ўтказмоқда. Қайд этилишича, бугунги анжуманда илк бор туман студияларидан ҳам 25 мингга яқин тадбиркор иштирок этмоқда.

Мирзиёев юртимиз иқтисодий қудратини мустаҳкамлашга фаол ҳисса қўшаётган 1 миллион 200 минглик бизнес ҳамжамиятини Тадбиркорлар куни билан табриклади.

Таъкидланишича, беш йил олдин тадбиркорлар билан очиқ мулоқот ўтказиш анъанаси бошланганидан буён бизнесга тўсиқ бўлган минглаб масалаларга ечим берилган. Бу борада 84 та қонун, 861 та фармон ва қарор қабул қилинган.

«Нима учун? Тадбиркорларимизга шароит яратиб, янги иш ўринларини кўпайтириш, одамларимизни узоққа бормасдан, маҳалласининг ўзида даромадли қилиш учун!» — деди Президент

Ўтган даврда бизнес учун ажратилган кредит портфели қарийб 3 карра ошиб, 450 триллион сўмга етди. Тадбиркорлар 650 триллион сўмлик солиқ ва божхона имтиёзларидан фойдаланди.

Кўплаб бизнес вакиллари хорижий банклардан ўз лойиҳаларига мустақил равишда 1 миллиард доллар жалб қилди. Давлатимиз раҳбари буни тадбиркорларимиз забт этган яна бир улкан марра сифатида баҳолади.

«Бугун тадбиркорларимиз «бизнесни бошлаш» босқичидан «капитални кўпайтириш» босқичига ўтяпти» – деди давлат раҳбари.

Сўнгги беш йилда корхоналарнинг асосий капиталга киритган инвестициялари уч баробар кўпайиб, 363 триллион сўмга етди. Йиллик саноат ҳажми 100 миллион доллардан ошган туманлар сони 66 тадан 116 тага кўпайди.

Ахборот технологиялари, финтех ва бошқа сервис соҳаларининг жадал ўсиши натижасида хизматлар ҳажми 1 триллион сўмдан ошган туманлар сони 41 тадан 152 тага етди. Халқаро маркетплейслар билан ишлаётган корхоналар сони эса 3,5 мингтани ташкил қилди.

Шунингдек, ўз бизнесини маҳаллада бошлаб, кейинчалик мамлакат бўйлаб ўнлаб филиаллар очган тадбиркорлар сони 550 тадан, миллий брендини яратганлар эса 300 тадан ошди.

Янги соҳалар шаклланди

Сўнгги йилларда мис, олтин, металл прокат, полиэтилен, ПВХ ва каолин каби хомашёлар таклифи кенгайтирилди. Бу электротехника, қурилиш материаллари, фармацевтика, тўқимачилик ва мебелсозлик каби соҳаларнинг жадал ривожланишига туртки берди.

Шу билан бирга, электромобиль, полимер ва маиший кимё, «яшил» энергетика ҳамда заргарлик саноати каби янги йўналишлар шаклланди. «BYD», «ADM Jizzakh» ва «Sirdaryo Asaka Motors» каби замонавий автомобиль заводлари соҳага янги технология ва компетенцияларни олиб кирди.

Президент, шунингдек, кўплаб маҳаллий тадбиркорлар ўз лойиҳаларини молиялаштириш учун хорижий банклардан мустақил равишда 1 миллиард доллар жалб қилганини қайд этиб, буни бизнес ҳамжамияти эришган муҳим натижалардан бири сифатида баҳолади.