Putin va Pashinyan Armanistonning YIga qo‘shilish masalasini yuzma-yuz gaplashib oldi

Rossiya prezidenti Vladimir Putin va Armaniston bosh vaziri Nikol Pashinyan Bishkek shahrida muzokaralar o‘tkazdi. Uchrashuvning asosiy mavzularidan biri Armanistonning Yevropa Ittifoqiga a’zo bo‘lish niyati va bu qarorning Rossiya Federatsiyasi bilan munosabatlarga ehtimoliy oqibatlari bo‘ldi.

Ular Shanxay hamkorlik tashkiloti sammiti doirasida uchrashgan. Muloqot chog‘ida Rossiya yetakchisi Moskva Armaniston bilan do‘stona va o‘zaro manfaatli aloqalarni rivojlantirish tarafdori ekanini bildirgan. Shu bilan birga, uning ta’kidlashicha, Yerevanning Yevropa sari yo‘nalishi Yevroosiyo iqtisodiy ittifoqi (YOII) doirasidagi keyingi hamkorlik uchun qiyinchiliklar tug‘dirishi mumkin.

YOII bozoridagi imtiyozlar va mintaqadagi yangi voqelik

«Armanistonning YIga intilishi — mamlakat va xalqning tabiiy, qonuniy huquqi. Bu suveren davlat va o‘z taraqqiyot yo‘nalishini arman xalqining o‘zi belgilaydi. Ammo bu, shubhasiz, Yevroosiyo iqtisodiy ittifoqida bo‘lishda qiyinchiliklar tug‘diradi hamda respublikaning YOII bozoridagi imtiyozlarining bekor bo‘lishi va yo‘lga qo‘yilgan savdo zanjirlarining uzilishi bilan tahdid soladi», — degan Putin.

Rossiya prezidenti Moskva arman xalqining tanlovini hurmat qilishini, biroq bu o‘rinda Rossiyaga Yerevanning keyingi siyosiy-iqtisodiy yo‘nalishini tushunib olish zarurligini ta’kidladi.

O‘z navbatida, Nikol Pashinyan Armaniston Rossiya Federatsiyasi bilan munosabatlarni yanada rivojlantirish va chuqurlashtirishdan manfaatdor ekanini tasdiqladi. Uning bildirishicha, Yerevan Yevropa Ittifoqiga kirish intilishida Rossiya va YOII bilan kelishuvlarning buzilishini ko‘rmayapti.

Mintaqadagi vaziyat so‘nggi yillarda tinchlik o‘rnatilganidan so‘ng o‘zgarganini eslatgan Armaniston bosh vaziri, Moskva va Yerevan o‘rtasidagi munosabatlarni yangi voqeliklarni inobatga olgan holda ko‘rib chiqish lozimligini qo‘shimcha qildi. Uning fikricha, bu holat ikki tomonlama aloqalarning yanada rivojlanishiga xizmat qilishi mumkin.