Qirg‘iziston yana yevroobligatsiyalar bozoriga chiqishi mumkin
2025-yilda ilk bor 700 mln dollarlik yevrobond joylashtirgan Qirg‘iziston yangi chiqarishni ham ko‘rib chiqmoqda. Hukumat bu orqali donorlar shartlarisiz mablag‘ jalb qilishni muhim afzallik deb baholamoqda.
© Foto: 24.kgQirg‘iziston joriy yilning o‘zida xalqaro yevroobligatsiyalar bozoriga yana chiqishi mumkin. Bu haqda Moliya vaziri Ruslan So‘ynaliyev 24.kg savoliga javoban ma’lum qildi.
«Agar zarurat bo‘lsa, yana chiqaramiz», – dedi u.
2025-yilda Qirg‘iziston ilk bor xalqaro bozorda 700 mln dollarlik yevroobligatsiyalarni joylashtirgan edi.
Ruslan So‘ynaliyevning so‘zlariga ko‘ra, yevrobondlar chiqarilishi mamlakat imijini mustahkamlash va xalqaro moliya bozorlari ishonchini oshirish yo‘lida muhim qadam bo‘lgan.
«Qo‘shni davlatlar bu yo‘nalishda ancha avval ish boshlagan. Yevroobligatsiyalar aynan iqtisodiyotimizni rivojlantirish uchun ishlatiladi», – dedi u.
Yevroobligatsiyalar afzalliklari
Uning ta’kidlashicha, yevroobligatsiyalarning asosiy afzalliklaridan biri donorlar tomonidan qo‘shimcha shartlar qo‘yilmasdan mablag‘ jalb qilish imkoniyatidir.
«Donorlar taklif qiladigan dasturlar har doim ham davlat uchun foydali emas. Ba’zan qonunchilikni o‘zgartirishimiz yoki tariflarni oshirishimizga to‘g‘ri keladi. Yaxshi shartli kreditlar ham bor, ammo hammasi ham maqbul emas», – deya tushuntirdi vazir.
Moliya vaziri so‘zlariga ko‘ra, yevrobondlar Qirg‘izistonga jalb qilingan mablag‘larni mustaqil ravishda boshqarish imkonini beradi.
«Yevrobondlar – hech qanday majburiyatlarsiz. Ha, ularning foizlari qimmatroq, lekin bu shartlarni yumshatadigan mexanizmlar mavjud», – dedi Ruslan So‘ynaliyev.
Uning aytishicha, xatarlarni kamaytirish maqsadida hukumat davlat qarzini yumshatish bo‘yicha maxsus hisobraqam tashkil qilgan.
«Agar bu davlat qarziga tushsa, u budjet uchun yuk bo‘lmasligi kerak», – deya ta’kidladi So‘ynaliyev.
