Qirg‘izistonga neft mahsulotlari yetkazib berish yil boshidan beri 19 foizga kamaydi

2026-yilning yanvar–may oylarida Qirg‘izistonning yoqilg‘i-energetika resurslari importi tarkibida tayyor neft mahsulotlarini olib kirish hajmi kamaydi. Shu bilan birga, suyultirilgan gaz yetkazib berish sezilarli darajada oshdi. Bu haqda Milliy statistika qo‘mitasi ma’lumotlarida aytilgan.

Neft mahsulotlari va benzin bozori

Joriy yilning dastlabki besh oyida Qirg‘izistonga 413 ming 136,3 tonna neft mahsulotlari olib kirilgan. Ularning umumiy qiymati 26 milliard 721 million 302,5 ming qirg‘iz somini (305 million 176,6 ming dollar) tashkil qilgan. Hajm jihatidan import o‘tgan yilgi ko‘rsatkichlarga nisbatan 19 foizga kamaygan.

Rossiya Qirg‘izistonga neft mahsulotlari yetkazib berishda asosiy o‘rinni saqlab qolgan. Rossiyadan 272 ming 617,9 tonna mahsulot olib kelingan. Bu o‘tgan yilga nisbatan 12,3 foizga kam. Qozog‘iston esa 125 ming 26,2 tonna neft mahsulotlari yetkazib bergan. Bu o‘tgan yilgi ko‘rsatkichdan 34 foizga past.

Shu bilan birga, Qozog‘istondan xom neft olib kirish qayta boshlangan. Jami 6 ming 391,5 tonna xom neft keltirilgan, uning qiymati 282 million 427,3 ming som bo‘lgan. Avtomobil benzini importi 22,3 foizga kamayib, 327 million 117,7 ming litrni tashkil qilgan. Uning umumiy qiymati 14 milliard 56 million 225,7 ming som bo‘lgan.

Rossiyadan 322 million 664,5 ming litr benzin olib kelingan, bu o‘tgan yilga nisbatan 12,9 foizga kam. Qozog‘istondan benzin importi esa keskin kamayib, 21,6 barobarga tushgan va 2 million 284,1 ming litrni tashkil qilgan.

Suyultirilgan gaz yetkazib berish

Bu yo‘nalishda esa ijobiy o‘sish kuzatilgan. Suyultirilgan gaz importi 35,9 foizga oshib, 80 ming 430,8 tonnaga yetgan. Sotib olingan gazning umumiy qiymati 2 milliard 636 million 716,8 ming somni (30 million 112,5 ming dollar) tashkil qilgan. Bu o‘tgan yilgi ko‘rsatkichdan 39,1 foiz ko‘p. Gaz importining deyarli barchasi Rossiyaga to‘g‘ri kelgan — 80 ming 414,7 tonna. Bu o‘tgan yilga nisbatan 39,7 foizga ko‘p.

Eslatib o‘tamiz, avvalroq Qirg‘iziston mamlakatdan yonilg‘i olib chiqishni taqiqlagandi.