Қонунчиликни бузган 6 та қурилиш компанияси жазоланди
Қурилиш объектларини қонунга зид равишда реклама қилган бир қатор компанияларга нисбатан молиявий жазо чоралари қўлланилди.
Ўзбекистонда кўп квартирали уйларни улуш киритиш асосида қуриш тартибига кўра, қурувчилар махсус электрон рўйхатга киритилмасдан туриб объектларни реклама қилиши тақиқланган. Бу талаб Ўзбекистон Республикаси Президентининг 2020 йил 27 майдаги ПҚ-4732-сон қарори билан тасдиқланган низомда белгиланган.
Рақобат қўмитаси томонидан ўтказилган ўрганишларда бир қатор қурилиш компаниялари ушбу талабларга амал қилмагани аниқланган. Жумладан, “Humo Avenue” МЧЖ, “Stroy Dom Siyob” МЧЖ, “Aziya Makon City” МЧЖ, “Aziza Credo Max” МЧЖ, “Shohsaroy Enter Group” МЧЖ ҳамда “Qorasuv Avenue” МЧЖ томонидан қурилиш объектлари электрон рўйхатга киритилмасдан ижтимоий тармоқларда реклама қилинган.
Амалдаги қонунчиликка кўра, ишлаб чиқарилиши ёки реализация қилиниши учун зарур рухсатномалари мавжуд бўлмаган товарлар ва хизматларни реклама қилиш тақиқланади. Бу норма “Реклама тўғрисида”ги Қонуннинг 16-моддасида белгилаб қўйилган.
Ўрганиш натижаларига кўра, Қўмита Махсус комиссияси мазкур компанияларни қонунбузар деб топди. Унга мувофиқ, уларга нисбатан белгиланган тартибда молиявий жарималар қўллаш ҳақида қарор қабул қилинди.
Шу билан бирга, компанияларга қонунбузилиш ҳолатларини зудлик билан бартараф этиш ва келгусида бундай ҳолатларга йўл қўймаслик бўйича кўрсатмалар берилди.
