Роналду жаримага тортилди

Португалия терма жамоаси сардори Криштиану Роналду миллий жамоа йиғинини рухсатсиз тарк этгани учун 30 кунга ўйинлардан четлатилди ва 255 евро жаримага тортилди. Бу ҳақда Португалия футбол федерациясининг интизом кенгаши қарор чиқарган.

Роналду 30-сентябр куни Копенгагендаги терма жамоа йиғинини тарк этган. Бунга бош мураббий Жорже Жезуш билан ўртасидаги келишмовчилик сабаб бўлган.

Футболчи олти ойгача дисквалификация қилиниши мумкин эди. Мураббий Норвегияга қарши аввалги ўйинда Роналдуни захирада қолдирган, бироқ учрашув давомида унга майдонга тушиш учун тайёргарлик кўришни буюрган. Кейинчалик Жезуш матбуот анжуманида футболчи Норвегияга қарши ўйинда майдонга тушмагани ва Данияга қарши баҳсда ҳам ўйнамаслигини айтган.

Шундан сўнг Роналду терма жамоа қароргоҳини тарк этган.

Футболчи кейинроқ мураббий унинг ишончини икки марта оқламаганини айтди. Унинг сўзларига кўра, мураббий уни ўйинга туширмаган ва воқеа ҳақида ваъда қилганидек, омма олдида тушунтириш бермаган.

Шу билан бирга, Роналду терма жамоа ва мухлислардан узр сўраган. У миллий жамоадаги фаолиятини якунлаш нияти йўқлигини ҳам билдирган.

Беш карра «Олтин тўп» соҳиби бўлган Роналду Португалия терма жамоаси сафида 234 та ўйинда майдонга тушиб, 146 та гол урган.

Португалия терма жамоаси навбатдаги учрашувини 14-ноябр куни Данияга қарши ўтказади. Сентябр ойидаги воқеа учун берилган жазо муддати бу учрашувгача ўтиб бўлгани сабабли Роналду ушбу баҳсда иштирок этиши мумкин.

Эслатиб ўтамиз, аввалроқ асли ўзбекистонлик миллиардер Алишер Усмонов «Эвертон» клубини сотиб олмоқчилиги ҳақида ёзган эдик.