Ўзбекистонда иш жойидаги тазйиқ ва зўравонликка қарши миллий дастур бошланди

Kecha 23:132 daqiqa

Ўзбекистонда ходимларнинг ҳуқуқ ҳамда қадр-қимматини ҳимоя қилиш, иш жойларида тазйиқ, зўравонлик ва камситишнинг олдини олишга қаратилган Миллий дастур амалиётга жорий этилмоқда. Дастур доирасида қонунбузилишлар ҳақида аноним хабар бериш имконини берувчи махсус портал ишга туширилиши ва ўн минглаб ходимлар ўқитилиши белгиланган.

Ўзбекистонда иш жойидаги тазйиқ ва зўравонликка қарши миллий дастур бошланди

Тошкент шаҳрида давлат органлари, халқаро ташкилотлар ва ривожланиш бўйича ҳамкорларнинг 70 га яқин вакили иштирокида мазкур дастурни амалиётга жорий этиш масалалари муҳокама қилинди.

«Ўзбекистон Республикаси Президенти Шавкат Мирзиёев томонидан қабул қилинган ислоҳот туфайли биз ҳар бир инсонга, эркак ёки аёл бўлишидан қатъи назар, институтлараро ҳурматни шакллантириш механизмини яратмоқдамиз. Бу ҳар бир ташкилотда меъёрга айланиши керак. Ўзаро ҳурмат маданияти Янги Ўзбекистонимиз учун соғлом жамият ва келажакнинг кучли кадрларини шакллантиради», - деди Президент Администрацияси раҳбарининг маслаҳатчиси, Инсон капиталини ривожлантириш лойиҳалари офиси бош координатори Нозимахон Давлетова.

Мазкур дастурни амалиётга татбиқ этиш жараёнида бир қатор муҳим чора-тадбирлар амалга оширилади:

• Жорий йилнинг декабрь ойига қадар ходимлар иш жойидаги қонунбузилишлар ҳақида аноним хабар бериши мумкин бўлган «Хавфсиз ва ҳурматга асосланган иш муҳити» рақамли портали ишга туширилади;

• Республиканинг 14 та ҳудудида жами 700 нафар фасилитатор тайёрланади. Ушбу мутахассислар давлат ташкилотларида инсон ресурсларини бошқариш ва хавфсиз иш муҳитини яратиш учун масъул бўлган 35 минг нафар ходимни ўқитади;

• Шунингдек, ходимларнинг мурожаатларини кўриб чиқиш ва кўрилган чораларни кузатиб боришнинг аниқ механизмлари йўлга қўйилади.

Тадбирда Олий суд раиси Робахон Маҳмудова, Бош прокурор ўринбосари Светлана Артикова, БМТнинг Аҳолишунослик жамғармаси (UNFPA)нинг Ўзбекистондаги доимий вакили Нигина Абасазаде ҳамда БМТнинг Ўзбекистондаги доимий координатори Сабин Маҳл ҳам иштирок этди. Расмийлар томонидан қонунчиликда белгиланган кафолатларни амалда ишлайдиган механизмларга айлантириш ҳамда бу борада идоралараро ҳамкорликни кучайтириш муҳимлиги қайд этилди.

Маълумот ўрнида, ушбу Миллий дастур Ўзбекистон Республикаси Президентининг 2026 йил 21 сентябрдаги ПҚ–345-сон қарори ҳамда Вазирлар Маҳкамасининг 2026 йил 28 сентябрдаги 518-сон қарори асосида амалга оширилмоқда.

Teglar

меҳнат ҳуқуқи Миллий дастур зўравонликка қарши кураш иш жойидаги тазйиқ аноним портал ходимлар ҳуқуқлари Нозимахон Давлетова Ўзбекистон қонунчилиги.

Mavzuga oid

Kecha 11:12

Қашқадарёда янги газ кони топилди

Ғузор туманидаги «Бурисой» конида қудуқ синовлари давомида саноат миқёсида газ ва конденсат оқими олинди. Қудуқдан кунига 400 минг куб метргача газ олинмоқда.

Kecha 12:05

Тошкентда 2030-йилгача 400 та маҳалла янгиланиб, 130 мингта иш ўрни яратилади

Пойтахтда маҳаллалар, мактаблар ва боғчаларни янгилаш, шунингдек, миллиард долларлик ишбилармонлик марказини қуриш режалаштирилмоқда.

Kecha 23:07

Азиза Қурбонова Президент Администрациясида янги лавозимга тайинланди

У бугун Президент Администрацияси Коммуникациялар департаменти бошлиғининг биринчи ўринбосари этиб тайинланди.

Kecha 19:24

Рақобат қўмитаси такси нархлари ошгани бўйича ўрганиш бошлади

Рақобат қўмитаси йирик агрегаторлар (Yandex, Uklon, MyTaxi) фаолиятидаги носозликлар ва инсофсиз рақобат ҳолатлари бўйича текширув бошлади.

Kecha 23:10

Хушнуд Худайбердиев Президент Администрациясида янги лавозимга тайинланди

Хушнуд Худайбердиев Президент Администрацияси Коммуникациялар департаменти бошлиғи ўринбосари лавозимига тайинланди.

Kecha 21:10

Эрта никоҳ учун белгиланган жарималар миқдори оширилди

Энди вояга етмаган шахс билан никоҳ муносабатига киришганлар 6,6 миллион сўмгача, фарзандини эрта турмушга берган ота-оналар 11 миллион сўмгача, расмий қайд этилмаган диний никоҳни ўтказганлар эса 22 миллион сўмгача жарима тўлайди.