Россия бензин экспортига қўйилган тақиқни 2027-йил бошигача узайтирди

Россия ҳукумати ички бозорда ёқилғи нархларини барқарор сақлаш ва тақчилликнинг олдини олиш мақсадида айрим турдаги ёқилғилар экспортига янги вақтинчалик чекловлар жорий қилди. Бу ҳақда ҳукумат ҳужжати имзоланди.

Қабул қилинган қарорга кўра, 2026-йил 1-августдан 2027-йил 31-январгача автомобиль бензини, дизель ёқилғиси, кема ёқилғиси ва газойль экспорти чекланади. Аввал ишлаб чиқарувчиларга берилган бензин ва дизель ёқилғисини экспорт қилиш рухсатининг муддати 31-июль куни якунланди.

Бироқ 2026-йил 1-сентябрдан бошлаб бевосита ёқилғи ишлаб чиқарувчи корхоналар дизель ёқилғиси, кема ёқилғиси ва газойлни яна экспорт қилиши мумкин бўлади. Автомобиль бензини экспортига қўйилган тақиқ эса 2027-йил 31-январгача барча учун сақланиб қолади. Дизель ёқилғисини воситачилар ва савдо компаниялари экспорт қила олмайди.

Чекловлар халқаро ҳукуматлараро битимлар доирасидаги етказиб беришлар ҳамда Россия ҳукумати қарори асосида хорижий давлатларга кўрсатиладиган гуманитар ёрдам учун мўлжалланган ёқилғига татбиқ этилмайди.

Шунингдек, ҳукумат қишлоқ хўжалиги ишлаб чиқарувчиларини ёқилғи билан узлуксиз таъминлаш мақсадида 2026-йил 1-ноябргача амал қиладиган махсус тартибни тасдиқлади. Унга кўра, Энергетика вазирлиги, Қишлоқ хўжалиги вазирлиги, ҳудудий ҳокимиятлар ва нефть компаниялари ўртасида махсус келишувлар тузилади. Бу фермер ва деҳқон хўжаликларини мавсумий дала ишлари вақтида бензин ҳамда дизель ёқилғиси билан узлуксиз таъминлашга хизмат қилади.

Яна бир ҳукумат қарорига кўра, 2026-йил охиригача давлат ва коммунал ташкилотлар учун мотор ёқилғисини харид қилиш тартиби соддалаштирилади. Махсус нарх белгилаш қоидалари вақтинча тўхтатилади ва харидлар давлат харидлари тўғрисидаги умумий қонунчилик асосида амалга оширилади. Бу эса биржа нархларидаги ўзгаришлар сабаб давлат харидларида узилишлар юзага келишининг олдини олиб, ёқилғининг ўз вақтида етказиб берилишини таъминлайди.

Мутахассисларнинг айтишича, бензин экспортининг тақиқланишига асосий сабаб — Украина дронларининг Россиядаги нефтни қайта ишлаш заводларига мунтазам ҳужумлари. Шу сабабли нефтни қайта ишлаш ҳажми камайган ва ички бозорда ёқилғи етишмовчилиги юзага келган.

«Forbes» экспертларига кўра, Россия бензинни кўп экспорт қилмайди. Шунинг учун экспортни тақиқлаш танқисликни фақат қисман камайтиради. Бироқ бу ички бозорда бензин нархининг кескин ошиб кетишининг олдини олади. Шу билан бирга, нефтни қайта ишлаш заводлари экспортдан тушадиган даромаднинг бир қисмини йўқотади, бу эса заводларни таъмирлаш ва тиклаш ишларига салбий таъсир қилиши мумкин.

Эслатиб ўтамиз, аввалроқ Марказий Осиёдаги энг қиммат бензин Ўзбекистонда сотилаётгани маълум бўлганди.