Россия ва Германия собиқ мулозимлари Алиевнинг хабарисиз Бокуда яширинча кўришди

Озарбойжон президенти Илҳом Алиев Бокуда Россия ва Германиянинг нуфузли вакиллари ўртасида Украинадаги урушни якунлаш масаласи муҳокама қилинган яширин учрашув бўлиб ўтганини тасдиқлади. Бу ҳақда Алиев Германия канцлери Фридрих Мерц билан ўтказилган қўшма матбуот анжуманида маълум қилди, деб ёзмоқда «Deutsche Welle».

Озарбойжон раҳбарининг сўзларига кўра, 12 июл куни мамлакатга Бранденбург ерининг собиқ бош вазири Маттиас Платцек ва Федерал канцлер маҳкамасининг собиқ раҳбари Роналд Пофалла, шунингдек, Россия Федерациясининг собиқ бош вазири Виктор Зубков ва Инсон ҳуқуқлари бўйича кенгаш раҳбари Валерий Фадеев келган.

Зубков 13 июл куни, қолган сиёсатчилар эса бир кундан кейин Озарбайжондан учиб кетган. Алиев улар ўртасида ўзаро алоқалар бўлган ёки йўқлиги ҳақида маълумотга эга эмаслигини таъкидлади.

«Бизнинг ҳудудимиздан бизни огоҳлантирмасдан фойдаланилган. Агар бу учрашув Россия ва Украина ўртасидаги урушни тугатишга хизмат қилса, биз буни фақат олқишлашимиз мумкин», — деди Озарбойжон президенти.

Маълумот ўрнида: Бокуда Германия ва Россия вакилларининг эҳтимолий учрашуви ҳақида 16 июл куни немисларнинг «Die Zeit» нашри ва RBB телеканали хабар берган эди. Журналистларнинг маълумотларига кўра, алоқалар Россия-Украина уруши бошланганидан сўнг расман тугатилган собиқ «Петербург мулоқоти» форуми доирасида амалга оширилган.