Шавкат Мирзиёев Қатарга ташрифини якунлаб, Вашингтонга жўнаб кетди
Қатарга амалий ташриф якунлангач, Шавкат Мирзиёев АҚШ президентининг таклифига биноан «C5+1» форматидаги саммитда иштирок этиш учун Вашингтон шаҳрига учиб кетди.
Ўзбекистон Республикаси Президенти Шавкат Мирзиёевнинг Қатар Давлатига амалий ташрифи якунланди. Бу ҳақда Президент матбуот хизмати хабар берди.
Шайх Ҳамад номидаги халқаро аэропортда Ўзбекистон президентини Бош вазир ўринбосари, мудофаа вазири Шайх Сауд бин Абдураҳмон Ол Соний ва бошқа расмий шахслар кузатиб қўйди.
Қайд этилишича, Шавкат Мирзиёев АҚШ президенти Доналд Трампнинг таклифига биноан Марказий Осиё мамлакатлари ва АҚШ етакчиларининг «C5+1» форматидаги саммитида иштирок этиш учун Вашингтон шаҳрига жўнаб кетди.
Ташриф дастурига кўра, Ўзбекистон президенти АҚШ президенти Доналд Трамп, Конгресс Сенати ва Вакиллар палатаси аъзолари, АҚШ вазирлик ҳамда идоралари раҳбарлари билан учрашувлар ўтказади.
Ўзбекистон билан АҚШ ўртасидаги стратегик шериклик муносабатларини, энг аввало, савдо-иқтисодий, инвестициявий ва гуманитар соҳаларда янада кенгайтириш ва мустаҳкамлаш, шунингдек, Марказий Осиёнинг АҚШ билан минтақалараро ҳамкорлигини чуқурлаштириш масалалари кўриб чиқилади.
Шунингдек, ишбилармонлик дастури доирасида АҚШнинг етакчи компаниялари ва молиявий институтлари раҳбарлари иштирокида учрашув ва тадбирлар ўтказилиши режалаштирилган.
Эслатиб ўтамиз, аввалроқ Ижтимоий ривожланиш бўйича иккинчи Жаҳон саммитида Шавкат Мирзиёев Глобал ижтимоий адолат фонди ташкил этишни таклиф қилгани ҳақида хабар бергандик.
