Си Жинпинг ўн йил деганда илк бор АҚШга боради
Пекинда бўлиб ўтган давлат зиёфатида Трамп Хитой раҳбари шарафига нутқ сўзлаб, уни Оқ уйга таклиф қилди.
Хитой раҳбари Си Жинпинг сентябр ойида АҚШга давлат ташрифини амалга ошириши кутилмоқда. Икки йирик давлат ўртасидаги рақобат кучайиб бораётган бир пайтда, томонлар муносабатларда барқарорликка эришиш йўлларини изламоқда. Бу ҳақда «South China Morning Post» нашри хабар берди.
АҚШ Президенти Доналд Трамп Пекинда Си Жинпинг билан ўтказилган саммитдан сўнг журналистларга берган интервюсида йил охиригача икки давлат етакчилари яна уч марта учрашиши мумкин эканини маълум қилди. Трампнинг сўзларига кўра, Хитой раҳбари уни ноябр ойида Шэнжэнда бўлиб ўтадиган Осиё-Тинч океани иқтисодий ҳамкорлиги (АТЭС) саммитида иштирок этишга таклиф қилган.
«Мен у ерда бўлишга ҳаракат қиламан», — деди АҚШ Президенти. Шунингдек, Трамп Си Жинпингнинг декабр ойида Майамида ўтадиган G20 саммитига келишини хоҳлашини қўшимча қилди.
Кеча, 15 май куни Пекинда бўлиб ўтган давлат зиёфатида Трамп Хитой раҳбари шарафига нутқ сўзлаб, уни Оқ уйга таклиф қилди. Кутилаётган ташриф 24 сентябр куни юз бериши мумкин. Агар бу амалга ошса, Хитой етакчисининг 2015 йил сентябридан бери АҚШга илк давлат ташрифи бўлади.
