«Сўнгги қўнғироқ» тадбирида мактабларга машина бошқариб келган ўқувчилар сони маълум бўлди
Эрталаб соат 07:00 дан 14:00 гача ўтказилган назорат тадбирлари давомида ўқувчиларнинг мактабларга автомобил ҳайдаб келиши билан боғлиқ 238 та ҳолат қайд этилган.
© Foto: t.me/YHXX_UZ25 май куни республика бўйлаб ўтказилган «Сўнгги қўнғироқ» тадбирлари давомида мактаблар атрофида хавфсизлик чоралари кучайтирилди. Йўл ҳаракати хавфсизлиги хизмати маълумотларига кўра, эрталаб соат 07:00 дан 14:00 гача бўлган вақт ичида автомобил бошқариб келган ўқувчилар билан боғлиқ 238 та ҳолат қайд этилди.
Маълум қилинишича, битирув тадбирлари ўтказилаётган ҳудудларда жамоат тартибини таъминлаш учун йўл-патрул хизмати ва ички ишлар органларининг қўшимча кучлари жалб этилган.
Расмийларга кўра, ижтимоий тармоқлар орқали олиб борилган тушунтириш ишлари ва профилактик тарғиботларга қарамасдан, айрим ўқувчилар автомобилда тадбирларга келган.
Огоҳлантириш
Текширувлар давомида автомобилларни бошқарган ўқувчилар орасида фақат битирувчи синф вакиллари эмас, балки 8-, 10-синф ўқувчилари ҳам бўлгани аниқланган.
Маълумотларга кўра, айрим ҳолатларда ўқувчилар ота-оналарига тегишли ёки ижарага олинган транспорт воситаларини бошқарган. Бу ҳолатлар масъул идораларнинг алоҳида эътиборини тортган.
Мулоқотлардан бирида 8-синф ўқувчиси автомобил бошқараётгани аниқланган бўлса, бошқа ҳолатда 2010-йилда туғилган, 10-синф ўқувчиси рулда экани маълум бўлган.
«Вояга етмаганлар томонидан автомобил бошқарилиши жиддий хавф туғдиришини таъкидлаб, ота-оналарни фарзандлари устидан назоратни кучайтиришни сўраймиз. Бундай ҳолатлар нафақат ўқувчиларнинг, балки бошқа фуқароларнинг ҳаёти учун ҳам хавфли эканини эслатиб қоламиз», – дейди Йўл ҳаракати хавфсизлиги хизмати расмийси Зойир Йўлдошов.
Эслатиб ўтамиз, 2025/2026-ўқув йилида 621 минг нафар 9-синф, 472 минг нафардан ортиқ 11-синф ўқувчилари мактабни битирмоқда.
