Соябон ва LED-экранлар: тадбиркорлар топган йўл қанчалик қонуний?
Тадбиркорлар реклама қилишнинг янги усулларини топгани ҳақида ёзган эдик. Бироқ Тошкент шаҳар ҳокимлиги Vaqt.uz’га маълум қилишича, витрина ва экранлар орқали реклама ҳам қонун доирасида чекланган.
© Vaqt.uz | Javhar ChorshanbiyevaТошкентда ташқи рекламага қарши кучайган рейдлар ортидан пешлавҳаларнинг олиб ташланиши, устига устак, компенсация тўланмагани кескин танқидларга сабаб бўлди. Бироқ айрим тадбиркорлар реклама қилишнинг янгича йўлини ўйлаб топишгани ҳақда ёзган эдик.
Ижтимоий тармоқларда тарқалган видеога кўра, тадбиркорлар дўкон ичига ўрнатилган телевизор ва LED экранлар орқали реклама қилишни таклиф қилиб, бу усул орқали қўшимча харажатлардан қочиш мумкинлигини таъкидлашган эди. Айримлар ҳатто витрина устидаги соябонларга бренд номларини жойлаштириш орқали яна бир қўшимча имкониятдан фойдаланаётганини айтишган.
Бироқ бу масаланинг ҳуқуқий жиҳатлари ҳам мавжуд. Тошкент шаҳар ҳокимлиги матбуот котиби Гулноза Қосимова Vaqt.uz’га маълум қилишича, ойналарни тўсган ҳолда реклама жойлаштириш тақиқланган.
Тошкент шаҳар халқ депутатлари кенгашининг 2024-йил 1-майдаги VI-101-60-14-0-K/24-сон қарори билан тасдиқланган регламент талабларига асосан ойнаalarni тўсган ҳолатда реклама воситаларини жойлаштиришга рухсат этилмайди.
Агар тадбиркор экран ўрнатмоқчи бўлса, бу аввалдан лойиҳада кўзда тутилган бўлиши керак. Акс ҳолда, ойна юзасини экран билан тўсиб қўйиш қонунбузарлик ҳисобланади.
Шунингдек, маркизанинг пастки қисмида реклама жойлаштиришга рухсат берилса-да, уни юқори қисмига катта ҳажмда ўрнатиш тақиқланган. Маркиза бинога мос ва уйғун рангларда бўлиши тавсия этилади.
Қарорга мувофиқ, қуйидаги турдаги реклама воситаларини ўрнатиш тақиқланади:
картон ёки баннер матосидан тайёрланган пешлавҳалар (афишалар бундан мустасно);
кўп қаватли уйлар фасадининг нотурар қаватлар чизиғидан юқорига ўрнатилган пешлавҳалар;
милтиллаб турадиган элементлардан иборат пешлавҳалар;
витрина ойнасининг тўлиқ баландлиги ёки кенглигини қоплайдиган электрон экранлар;
динамик тизимларда (призматрон ва бошқалар) ёки электрон ташувчиларда намойиш этиладиган реклама пешлавҳалари (витрина ичидаги экранлар бундан мустасно);
биноларнинг соябонларига жойлаштирилган пешлавҳалар;
турар жой бинолари чегарасида ўрнатилган реклама воситалари;
кўп қаватли уйлар фасадининг ён қисмларига ўрнатилган пешлавҳалар;
айвон, балкон ва уларнинг том қисмига жойлаштирилган реклама воситалари;
фасаднинг меъморий деталларига ўрнатилган пешлавҳалар;
кўча номлари ва уй рақамларини тўсиб қўядиган реклама воситалари;
фасад юзасига ёпиштирилган ёки бўёқ орқали туширилган пешлавҳалар.
Эслатиб ўтамиз, аввалроқ пойтахтда ноқонуний ташқи рекламаларга қарши рейдлар бошлангани, феврал ойидан бошлаб эса жараён янада авж олди.
