Сунъий интеллект бозори: ChatGPT трафиги пасайди, Gemini ва Grok тез ўсмоқда

Генератив сунъий интеллект бозори рақобатнинг янги босқичига кирди. Илк устунликка эга бўлган мустақил СИ-платформалар ўрнини йирик рақамли экотизимларга чуқур интеграциялашган ечимлар эгалламоқда. Бу ҳақда «Similarweb»нинг Investor Intelligence ҳисоботида қайд этилди.

2026 йил 2 январгача бўлган сўнгги 12 ҳафталик маълумотларга кўра, «OpenAI» ишлаб чиққан ChatGPT трафиги 22 фоизга қисқарган. Бу ҳолат бозор етакчиси учун сезиларли бурилиш нуқтаси сифатида баҳоланмоқда.

Шу вақт ичида рақобатчилар кескин ўсишни намоён этди. «xAI» компаниясининг Grok чат-боти трафиги 52 фоизга ошган. «Google»нинг Gemini маҳсулоти эса 49 фоизлик ўсишни қайд этган. Таҳлилчилар бу тенденцияни фойдаланувчиларнинг алоҳида веб-платформалардан кўра, ўзлари ҳар куни ишлатадиган қидирув ва ижтимоий тармоқларга боғланган ИИ воситаларини танлаётгани билан изоҳлайди.

Босим фақат ChatGPT билан чекланиб қолмаган. Илгари «Google»га рақобатчи сифатида тилга олинган Perplexity ҳам сўнгги уч ойда 27 фоиз трафик йўқотган. Контент ёзиш ва копирайтингга ихтисослашган СИ воситалари сегментида ҳам умумий трафик 10 фоизга камайган.

Мутахассисларнинг фикрича, бу рақамлар «романтик СИ даври» якунланаётганини англатади. Энди технологиянинг ўзи етарли эмас — ҳал қилувчи омил сифатида тарқатиш каналлари ва мавжуд маҳсулотларга интеграция биринчи ўринга чиқмоқда.

Инвесторлар учун бу мустақил СИ-компанияларини баҳолашни қайта кўриб чиқиш сигнали ҳисобланади. «OpenAI» учун эса бу стратегик бурилиш нуқтаси бўлиб, компания ё мутлақо янги имкониятларни таклиф қилиши, ёки кенг қамровли платформага айланиши зарурлигини кўрсатмоқда.