Тошкентда «Маҳаллада ободлик ва меҳр-саховат ойлиги» бўйича йиғилиш ўтказилди

Шайхонтоҳур туманидаги Алишер Навоий номидаги киносаройда «Маҳаллада ободлик ва меҳр-саховат ойлиги» доирасида кенгайтирилган йиғилиш бўлиб ўтди. Анжуманда маҳаллаларни янада обод қилиш, куз-қиш мавсумига пухта тайёргарлик кўриш ҳамда аҳоли бандлигини ошириш бўйича устувор вазифалар белгилаб берилди.

Тадбирда Президент Администрацияси вакиллари, Тошкент шаҳар прокуратураси, Ички ишлар бош бошқармаси, Миллий гвардия, коммунал хизматлар, Бошқарув сервис компаниялари, «Маҳалла» уюшмаси мутасаддилари ҳамда пойтахтдаги барча маҳалла фуқаролар йиғинлари раислари иштирок этди.

Ташкилотчилар маълумотига кўра, тадбирга жами 1 200 нафарга яқин масъул ва раҳбар жалб этилган.

Белгиланган устувор вазифалар ва кутилаётган натижалар

Йиғилиш давомида масъулларга бир қатор аниқ топшириқлар берилди. Хусусан, кўчалар, ҳовлилар, ариқ ва хиёбонларни ободонлаштириш ҳамда кўкаламзорлаштириш ишларини жадаллаштириш, шунингдек, маҳаллаларда инфратузилма муаммоларини ҳал этишга қаратилган лойиҳаларни аҳоли иштирокида шакллантириш вазифаси қўйилган.

Шу билан бирга, ишсиз фуқароларни даромадли меҳнатга йўналтириш бўйича маҳалла банкирлари билан тизимли ишлаш, коммунал хизматлар фаолиятини яхшилаш ва дебитор қарздорликни қисқартириш юзасидан аниқ кўрсатмалар берилган.

Мазкур чора-тадбирлар маҳаллаларда обод муҳитни яратиш, инфратузилмани яхшилаш, аҳоли бандлигини таъминлаш ва ҳудудларнинг куз-қиш мавсумига тайёргарлигини янада мустаҳкамлашга хизмат қилади.