Трамп маъмуриятида қанча миллиардер бор? The Washington Post номма-ном рўйхат тузди

The Washington Post газетаси АҚШ президенти Доналд Трампнинг иккинчи маъмуриятига кирган миллиардерлар рўйхатини тузибди. Президентнинг ўзини ҳисобга олмаганда, улар жами 12 киши экан. Уларнинг умумий бойлиги 390 миллиард долларга баҳоланибди. Бу Трампнинг ҳозирги жамоаси, АҚШнинг замонавий тарихидаги энг бой маъмурияти деб ҳисобланган биринчи муддатидаги маъмуриятидан ҳам бойроқ эканлигини кўрсатмоқда.

The Washington Post тузган рўйхат:

Илон Маск — 342 млрд доллар. Дунёнинг энг бой кишиси ва Трампнинг йирик ҳомийси. 2024 йилги сайлов кампаниясида Маск республикачиларни қўллаб-қувватлаш учун 294 миллион доллар сарфлаган. У Трамп маъмуриятига давлат аппаратини модернизация қилиш ва харажатларни қисқартириш вазифаси юклатилган Давлат самарадорлиги департаменти (DOGE) раҳбари сифатида кирган. DOGE ҳам, Маскнинг ўзи ҳам оммабоп бўлмаган. 2025 йил июнида Трамп билан юзага келган очиқ низодан кейин Маск маъмуриятдан кетган. Уларнинг ўзаро айблашувлари ижтимоий тармоқларда ҳам давом этган: Трамп Маск компанияларини субсидиялардан маҳрум қилиш билан таҳдид қилган, Маск эса Dragon кемасини эксплуатация қилишни тўхтатишини айтган.

Тилман Фертитта — 11,3 млрд доллар. Fertitta Entertainment асосчиси. Компания ресторанлар, меҳмонхоналар, казинолар тармоқларини бирлаштиради ва “Houston Rockets” клубига эгалик қилади. Фертитта 2016–2018 йилларда CNBC'даги “Billion Dollar Buyer” реалити-шоуси қаҳрамони бўлган. У ва рафиқаси 2024 йилги сайловлар олдидан республикачиларга қарийб 1 млн доллар хайрия қилган, яна 1 млн долларни Трамп инаугурациясига берган. Шундан тўрт кун ўтиб, Фертитта АҚШнинг Италия ва Сан-Марино элчиси этиб тайинланган.

Жо Геббиа — 8,3 млрд доллар. Airbnb ҳаммуассиси. Трамп инаугурацияси олдидан X (Twitter) да “Биз мамлакатни яна буюк қила оламиз — Мексика қўлтиғидан Гренландиягача” деб ёзган. DOGE таркибида пенсия тизимини модернизация қилиш устида ишлаган. 2025 йил августда Трамп “АҚШ бош дизайнери” лавозимини таъсис этиб, Геббиани шу лавозимга тайинлаган.

Мелинда Ҳилдебранд — 7,7 млрд доллар. Hilcorp Energy асосчиси Жеффри Ҳилдебранднинг рафиқаси. У илгари активлари 100 млн доллардан ортиқ бўлган хайрия фондини бошқарган. Ҳилдебрандлар Техасдаги энг бой оилалардан. 2020 йилда Трамп кампаниясига 1 млн доллардан ортиқ маблағ берган, 2024 йилда инаугурацияга яна 1 млн доллар йўналтирган. Трамп президентликка қайтгач, Мелинда Ҳилдебрандни Коста-Рика элчиси этиб тайинлаган.

Доналд Трамп — 5,1 млрд доллар. 2017 йилда унинг бойлиги 3,5 млрд долларга баҳоланган бўлса, иккинчи президентлиги даврига келиб активлари 5 млрд доллардан ошди. Бу кўчмас мулкдан ташқари соҳа, жумладан криптовалюталар ва Truth Social'га киритилган инвестициялар ҳисобига ошган.

Стивен Файнберг — 5 млрд доллар. Cerberus Capital Management ҳаммуассиси. Мудофаа вазири ўринбосари этиб тасдиқланишидан олдин 1800 бетлик декларация тақдим этган. Пентагон харажатларини қисқартириш орқали бюджетни тежаш ниятида экани айтилган. 2024 йилда кампанияга йирик маблағ бермаган бўлса-да, 2016 ва 2020 йилларда Трампнинг асосий донорларидан бўлган.

Уоррен Стивенс — 3,4 млрд доллар. Молиячи, АҚШнинг Буюк Британиядаги элчиси. Stevens Inc. инвестиция банкини унинг амакиси тузган, у 1970-йилларда Walmart'ни бозорга олиб чиққан. Стивенс 2016 йилда анти-трамп ташаббусларини қўллаб-қувватлаган, кейин Трампнинг йирик донорига айланган. Элчи этиб тайинланган куннинг ўзида президентга 5 млн доллар хайрия қилган.

Ҳовард Лютник — 3,2 млрд доллар. Савдо вазири, импорт божлари тарафдори ва Трамп кампанияси учун маблағ йиғувчиси. У раҳбарлик қиладиган Cantor Fitzgerald компанияси 11-сентябр воқеаларида ходимларининг учдан икки қисмини йўқотган. Лютник ҳам ўша куни тасодифан тирик қолган. Компания кутилганидек инқирозга учрамаган ва фаолиятини давом эттирган.

Линда Макмеҳон — 3 млрд доллар. WWE империяси асосчиларидан бири. У ва эри Винс 2015 йилдан буён республикачиларга 47 млн доллардан ортиқ маблағ берган. Трамп биринчи президентлигида уни Кичик бизнес бошқармасига, вақтинча тугатиш режаси амалга ошмаганидан кейин эса Таълим вазирлигига раҳбар қилиб қўйган.

Антонио Грасиас — 2,2 млрд доллар. Маскнинг яқин дўсти ва Tesla hamda SpaceX'нинг илк инвесторларидан. Илгари демократларни қўллаб-қувватлаган, лекин 2024 йилда Трамп ташаббусларига 2 млн доллар хайрия қилган. DOGE таркибида ижтимоий тўловлар билан ишлаган, аммо манфаатлар тўқнашуви айбловларидан кейин 2025 йилда истеъфога чиққан.

Стив Уиткофф — 2 млрд доллар. Девелопер, Трампнинг кўп йиллик яқин дўсти. 2016 йилдан буён республикачиларга ҳар сайловда 200 минг доллардан ортиқ хайрия қилган. Трампнинг иккинчи маъмуриятида тинчлик миссиялари бўйича махсус вакил бўлган ва ҳозир Россия–Украина уруши бўйича музокараларда қатнашмоқда.

Келли Леффлер — 1,3 млрд доллар. ICE асосчиси Жеффри Спречернинг рафиқаси. Леффлер крипто стартап Bakkt'ни бошқарган, бир йил сенатор бўлган. 2016 йилдан буён Трамп ташаббусларига 15 млн доллардан ортиқ хайрия қилган. У ҳозир Кичик бизнес агентлигини бошқармоқда.

Пол Аткинс — 1,2 млрд доллар. Юрист ва тадбиркор. Илгари Қимматли қоғозлар ва биржалар комиссиясида юқори лавозимда ишлаган. Трамп даврида агентлик раҳбари этиб тайинланган. У криптоиндустрияга нисбатан илгариги раҳбарларга қараганда анча юмшоқ ёндашув тарафдори сифатида тилга олинган.