Трамп НАТОдан чиқишни кўриб чиқмоқда
Доналд Трамп АҚШнинг НАТОдан чиқиш эҳтимолини таъкидлаб, алянс самарадорлигини танқид қилди.
АҚШ президенти Доналд Трамп Қўшма Штатларнинг НАТОдан чиқиш имкониятини кўриб чиқаётганини маълум қилди. У бу ҳақда «The Telegraph» нашрига берган интервюсида айтди ва бу масала «жиддий кўриб чиқилаётган қарор» эканини таъкидлади.
Трамп ўз чиқишида НАТОни «қоғоз йўлбарс» деб атаб, алянс уни ҳеч қачон ишонтира олмаганини билдирди.
Эрон можароси ва иттифоқчилар позицияси
Президент ўз норозилигини, айниқса, Эрон билан боғлиқ можаро фонида иттифоқчилар томонидан етарлича қўллаб-қувватлов бўлмагани билан изоҳлади.
Шу билан бирга, Трамп АҚШнинг Эрон билан боғлиқ ҳарбий ҳаракатлари тез орада якунланиши мумкинлигини билдирди. Унинг сўзларига кўра, бу жараён «икки-уч ҳафта» ичида тугаши эҳтимолдан холи эмас.
Вашингтондаги расмий позиция
Аввалроқ АҚШ давлат котиби Марко Рубио ҳам бу масалага муносабат билдириб, Вашингтон НАТОнинг мамлакат учун аҳамиятини қайта баҳолаши мумкинлигини қайд этганди.
«Биз НАТОнинг мамлакатимиз учун қай даражада аҳамиятли эканини қайта кўриб чиқишимизга тўғри келади. Якуний қарор барибир президентда қолади», — деди у «Fox News» телеканалига берган интервюсида.
Рубиога кўра, алянс маълум вақт давомида АҚШ манфаатларига хизмат қилган, аммо ҳозир унинг самарадорлиги ва тенг шериклик тамойили қайта кўриб чиқилиши зарур. У, шунингдек, Европа давлатлари томонидан ҳар доим ҳам керакли даражада қўллаб-қувватлов бўлмаётганини танқид қилди.
