Трамп Венесуэла соҳилларига 16 минглик ҳарбий гуруҳ жўнатди
АҚШ Венесуэла қирғоқларига 16 минг ҳарбийдан иборат катта денгиз гуруҳини йўллади. Экспертлар бу ҳаракатни Вашингтоннинг Кариб минтақасидаги операцияларини кенгайтириш белгиси сифатида баҳоламоқда.
The Washington Post хабарига кўра, АҚШ президенти Доналд Трамп Венесуэла соҳиллари томон 16 минглик ҳарбий контингентни жўнатди. Гуруҳ таркибига саккизта ҳарбий кемалар, атом сувости кемаси, B-52 стратегик бомбардимончи учоғи, замонавий F-35 қирувчи учоқлари ва бешта ҳамроҳ кемаси билан Gerald R. Ford авиаташувчи кемаси кирган.
Бу ҳаракат АҚШнинг Кариб денгизида ҳарбий мавжудлигини сезиларли даражада кучайтирди. Нашрнинг таъкидлашича, бундай қадам Вашингтон ва Каракас ўртасидаги муносабатларни янада таранглаштириши ва АҚШнинг Венесуэлага қарши эҳтимолий ҳарбий зарбалар бериш хавфини оширади.
АҚШ ҳукумати 24 октябр куни Gerald R. Ford авиаташувчиси бошчилигидаги ҳарбий гуруҳни жойлаштиришни расман эълон қилган эди. Оқ уй бу қарорни «минтақадаги наркотрафикка қарши операцияларни кучайтириш» билан изоҳлади. Шу куни Вашингтон Колумбия президенти Густаво Петровга нисбатан санкциялар жорий қилди.
The Wall Street Journal ва The New York Post манбаларига кўра, АҚШ маъмурияти Венесуэла ҳудудидаги ҳарбий объектларга зарба бериш сценарийларини тасдиқлаган. Пентагон яқин кунларда амалий ҳаракатларга ўтиши мумкинлиги ҳақида хабар берилган. Аммо Доналд Трамп бу маълумотларни рад этиб, «бундай режалар йўқ»лигини айтди.
Аввалроқ Венесуэла президенти Николас Мадуро Россиядан ҳарбий ёрдам сўрагани ҳақида хабар берган эдик. Унинг хатида Москвадан 14та зенит ракета мажмуаси, Су-30МК2 қирувчи самолётларини таъмирлаш ва қайта тиклаш, саккизта двигател ва бешта радарни таъмирлаш, шунингдек логистик ёрдам кўрсатиш илтимос қилинган.
Бундан ташқари, Мадуро Хитой ва Эронга ҳам мурожаат қилиб, ҳарбий ҳамкорликни кенгайтириш, дронлар, GPS-жамловчи қурилмалар ва кузатув тизимларини етказиб беришни сўраган.
