Туну-кун ишловчи кўчаларда реклама ва ёритишга электр нархлари икки бараварга камайтирилиши мумкин

Стратегик ислоҳотлар агентлиги томонидан тайёрланган президент қарори лойиҳасида кечаси ва тунда ишлайдиган корхоналарни қўллаб-қувватлаш чоралари назарда тутилган. Унга кўра, «24 соатлик кўчалар»да филиал очган маҳаллий бренд эгаларига кредит фоизини тўлаш бўйича харажатлар қоплаб берилади. Маҳаллий брендга эга тадбиркорлик субъектлари томонидан туну-кун фаолият кўрсатувчи кўча ва ҳудудларда ўз филиалини очиш учун бир филиал камида:

• 5 та янги иш ўрни яратган тақдирда 1 миллиард сўмгача;
• 10 та янги иш ўрни яратган тақдирда 5 миллиард сўмгача;
• 15 та янги иш ўрни яратган тақдирда 10 миллиард сўмгача;
• 20 та янги иш ўрни яратган тақдирда 15 миллиард сўмгача ажратилган кредитлар бўйича фоизли харажатнинг Марказий банк асосий ставкасидан 4,5 фоизлик пункт юқори ва асосий ставканинг 1,75 бараваридан ошмаган ставкада миллий валютада ажратиладиган кредитлар бўйича асосий ставканинг 25 фоизигача миқдорда уч йилдан ортиқ бўлмаган муддатга компенсация тақдим этилади;

Янги ходимларни тайёрлаш ва қайта ўқитиш харажатларининг ярми, бир нафар ходим учун эса базавий ҳисоблаш миқдорининг беш баробаридан ошмаган қисми қоплаб берилади. Шунингдек, маҳаллий маҳсулотлар учун миллий сертификат олиш харажатлари тўлиқ, халқаро сертификатлар бўйича эса 3 минг долларгача компенсация ажратилади. Энг муҳим ўзгаришлардан бири — 2025 йил 1 сентябрдан бошлаб туну-кун ишлайдиган кўча ва ҳудудларда ташқи реклама, медиафасад ва ёритиш қурилмалари учун электр энергияси тариф коэффициенти 3 баравардан 1,5 бараварга туширилиши. Бу тадбиркорлар учун харажатларни сезиларли қисқартириши кутилмоқда.