Туркиялик ҳакамлар ва футболчилар жазоланди

Профессионал футбол интизом кенгаши «Галатасарой» ўйинчиси Эрен Элмалини 45 кунга, Метехан Балтажини эса 9 ойга мусобақалардан четлатганини маълум қилди. «Коняспор» футболчиси Ндао эса 12 ойга мусобақалардан четлаштирилди. Бу ҳақда NTV хабар берди.

Қолган ўйинчиларга ҳам турли хил жазо чоралари қўлланилди.

Аввалроқ хабар қилинганидек, Туркияда 600 га яқин футболчи ўйинларга ноқонуний пул тикиш иши бўйича тергов олиб борилаётгани сабабли сўроққа чақирилиши кутилмоқда эди.

Интерпол Туркия ҳуқуқ-тартибот идоралари олиб бораётган ишга қизиқиш билдирди. Тергов маълумотларига кўра, ўйинчилар, мураббийлар ва агентлар Албания, Болгария ҳамда Шимолий Кипрда фаолият юритувчи ноқонуний сайтларда ставкалар қилганликда гумон қилмоқда.

Бундан олдин TRT Haber Туркия футбол федерацияси (ТФФ) 149 нафар профессионал ҳакамни букмекерлик идораларида ўйинларга пул тикиш учун ҳисоблари аниқлангани сабабли 8 ойдан 1 йилгача бўлган муддатга мусобақалардан четлатгани ҳақида хабар берган эди.

Истанбул бош прокуратураси гаров ўйинлари иши бўйича 17 нафар ҳакамни қамоққа олиш учун ордер чиқарди, ҳибсга олинганлар орасида Суперлига клуби президенти ҳам бор.