Туркиялик мутахассис «Янги Тошкент» аэропорти қурилиш лойиҳасининг бош менежери этиб тайинланди

Туркиялик мутахассис Берк Албайрак «Янги Тошкент» халқаро аэропорти қурилиши лойиҳаси офисининг бош менежери этиб тайинланди. Берк Албайрак ушбу тайинлов ҳақида ўзининг LinkedIn саҳифасида маълум қилди.

Унда у лойиҳа доирасида барча манфаатдор томонлар билан ҳамкорлик қилиб, аэропорт қурилишида юқори самарадорликка эришиш нияти борлигини таъкидлаган. Мутахассиснинг сўзларига кўра, «Янги Тошкент» аэропорти нафақат Ўзбекистон, балки бутун минтақа учун муҳим транспорт хабига айланиши мумкин.

Албайрак авиация инфратузилмаси соҳасида катта тажрибага эга. У илгари Истанбулда жойлашган Сабиҳа Гўкчен халқаро аэропорти бош директори лавозимида фаолият юритган. Мазкур аэропорт Европадаги энг йирик авиация марказларидан бири ҳисобланади. Шунингдек, у Кувайтда қурилаётган янги аэропорт лойиҳасида лойиҳа директори сифатида ишлаган.

Маълумот учун. Албайрак 1970 йилда Анқара шаҳрида туғилган. У Анқарадаги Яқин Шарқ техник университетида қурилиш муҳандислиги йўналишида таълим олган, кейинчалик магистрлик даражасини ҳам шу ерда қўлга киритган. Кейинчалик у Туркия Транспорт вазирлиги ҳузуридаги ДҲМИ тизимида ўн йилдан ортиқ ишлаган.

Эслатиб ўтамиз, «Янги Тошкент» халқаро аэропорти Тошкент вилоятининг Ўрта Чирчиқ ва Қуйи Чирчиқ туманларида 1300 гектар майдонда қурилади. Лойиҳа давлат-хусусий шериклик асосида амалга оширилиб, унда Саудия Арабистонининг Vision Invest, Япониянинг Sojitz компанияси ҳамда Корея Республикасининг Incheon International Airport Corporation иштирок этади.

Қурилиш тўрт босқичда амалга оширилади. Биринчи босқич қиймати 2,5 млрд доллар бўлиб, унда терминал ва аэродром қурилиши режалаштирилган. Аэропорт тўлиқ ишга тушгач, йилига 20 миллион йўловчига хизмат кўрсатиш, соатига 30 тагача учиш-қўнишни таъминлаш ҳамда 129 минг тонна юк қабул қилиш имкониятига эга бўлади.