Украинада уруш тугамасидан олдин сайловлар ўтказиладими? Зеленский офиси жавоби
Президент офиси маслаҳатчиси Михаил Подоляк собиқ вазир Михаил Фёдоровнинг сайловларни ўтказиш ҳақидаги таклифига муносабат билдирди.
Украинада ҳозирги вақтда янги президентлик сайловларини ўтказишнинг имкони йўқ ва бу жараён қолдирилади. Бунга амалдаги ҳуқуқий тақиқ ҳамда хавфсиз овоз бериш учун етарли шароитларнинг мавжуд эмаслиги асосий сабаб қилиб кўрсатилмоқда. Бу ҳақда Украина Президенти офиси маслаҳатчиси Михаил Подоляк Италиянинг «Repubblica» газетасига берган интервюсида маълум қилди.
Собиқ вазирнинг чақириғи
Маълум қилинишича, Президент офиси вакили Михаил Подоляк собиқ мудофаа вазири Михаил Фёдоровнинг яқин вақт ичида мамлакатда сайловлар ўтказиш бўйича билдирган таклифига ўз муносабатини билдириб ўтган.
Унинг таъкидлашича, бугунги қуролли тўқнашувлар шароитида сайлов жараёнларини ташкил этиш кафолатланмаган хавф-хатарларни келтириб чиқаради.
«Сиёсий жараённинг ҳар қандай иштирокчиси, жумладан, нафақат собиқ мудофаа вазири Михаил Фёдоров, балки бошқалар ҳам турли баёнотлар билан чиқиш ҳуқуқига эга. Аммо сайлов кампаниясини ўтказиш учун тўсиқлар сезиларли даражада кучайди... бундай вазиятда сайловлар хавфсизлигини кафолатлаш мутлақо мумкин эмас. Қолаверса, сайлов ўтказиш бўйича қонунчиликдаги ҳуқуқий тақиқ ҳали ҳам ўз кучида қолмоқда», — дея Подолякнинг сўзларидан иқтибос келтирди нашр.
Эслатиб ўтамиз, бундан аввалроқ собиқ мудофаа вазири Михаил Фёдоров Украина аҳолисига махсус видеомурожаат йўллаган эди. У ўз мурожаатида уруш ҳаракатлари тўлиқ якунланмасидан олдин ҳам мамлакатда президентлик сайловларини ўтказиш таклифини илгари сурган.
