Венгрия ва Словакия Хорватиядан Россия нефтини етказиб беришни сўрамоқда

Украина орқали «Дружба» нефт қувури бўйича Россия нефти етказиб бериш тўхтатилгандан кейин Венгрия ва Словакия Хорватиядан Россия хомашёсини Адриатика нефтқувури (JANAF) орқали етказиб беришни йўлга қўйишни сўради. Бу ҳақда дкеча, 16 феврал куни Венгрия ташқи ишлар вазири Петер Сийярто Х ижтимоий тармоғида ёзди.

Вазирнинг таъкидлашича, санкция истисноси туфайли Загреб бу илтимосни бажаришга қодир, чунки у «қувур орқали етказиб беришда узилишлар бўлса, Россия нефтини денгиз орқали импорт қилиш имкониятини назарда тутади».

Хорватия транзитга рози, аммо фақат ЕИ ва АҚШ қоидалари доирасида

Хорватия иқтисод вазири Анте Шушняр мамлакат ёрдам беришга тайёр эканини билдирди.

«Хорватия Марказий Европада ёқилғи таъминоти хавф остида қолишига йўл қўймайди. Биз ЕИ қонунчилиги ва OFAC қоидалари доирасида узилишлар билан боғлиқ ўта долзарб муаммони ҳал этишга тайёрмиз. Ҳеч ким ёқилғисиз қолмаслиги керак», – деб ёзди у Х ижтимоий тармоғида.

Аввалроқ Виктор Орбан ҳукумати бир неча бор JANAF қувури зарур ҳажмда нефт узатишга қодир эмаслигини, шунингдек, Хорватия ҳукуматининг транзит тўловларини оширгани Венгрия учун бу йўлни тижорий жиҳатдан манфаатсиз қилиб қўйганини таъкидлаган эди.

Шу билан бирга, Шушняр Адриатика нефт қувури танқидларга қарамай ишга тайёр эканини, шу сабабли Европа Иттифоқининг исталган давлати учун Россия нефтига қарам бўлиб қолишни оқлайдиган техник сабаблар қолмаганини билдирди.

«Россиядан сотиб олинган баррел айрим давлатларга арзонроқ туюлиши мумкин, аммо у урушни ва украин халқига қарши ҳужумларни молиялаштиришга хизмат қилади», – деди вазир.

«Дружба» орқали етказиб бериш 27 январдан тўхтатилган

Украина ташқи ишлар вазири Андрей Сибига 27 январдан «Дружба» нефт қувури орқали етказиб бериш тўхтатилишини Венгриянинг Украина ҳудудидаги қувур қисмига Россия зарбаси берилгани ҳақида сукут сақлагани билан изоҳлади. Бунга жавобан Будапешт Украина томони ушбу қувур участкасида электр таъминотини ўчириб қўйганини билдирди. Словакия бош вазири Роберт Фицо 15 феврал куни Украинани экспортни қайта тиклашни атайлаб чўзаётганликда айблади.

«Reuters» агентлигининг ёзишича, Венгриянинг MOL энергетика компанияси аллақачон Будапешт ҳукуматидан стратегик нефт захираларидан фойдаланишга рухсат сўраган. Агар шарқдан етказиб бериш яқин кунларда тикланмаса, биринчи босқичда тахминан 250 минг тонна хом нефт ажратиш талаб этилади, деб хабар қилди компания.

«ExPro» таҳлил компанияси маълумотларига кўра, 2025 йилда Украина «Дружба» нефт қувурининг жанубий тармоғи орқали тахминан 9,73 млн тонна Россия нефтини транзит қилган.