Хитой экспорт қилган бир миллиондан ортиқ электромобил харидорсиз қолди
Халқаро энергетика агентлиги ҳисоботига кўра, ички бозорда талаб пасайиши ортидан экспортга йўналтирилган автомобиллар жаҳон портлари ва логистика омборларида тўпланиб қолмоқда.
Хитойдан сўнгги бир ярим йил давомида экспорт қилинган бир миллиондан ортиқ электромобил ҳали ҳам якуний харидорга етиб бормаган. Бу ҳақда 30 июл куни эълон қилинган Халқаро энергетика агентлиги маълумотларида қайд этилди.
Ҳисоботга кўра, бунинг бир қисми денгиз орқали ташиш муддатлари узайгани билан изоҳланади. Бироқ агентлик жаҳоннинг турли портлари ва логистика омборларида автомобиллар захираси меъёрдан ортиқ даражага етганини таъкидламоқда.
Қайд этилишича, бу вазият Хитой автосаноати ички бозорда талаб пасайганидан кейин ортиқча маҳсулотни ташқи бозорларга йўналтиргани билан боғлиқ.
Ички бозорда талаб тушди
Маълумотларга кўра, 2026 йилнинг биринчи ярмида Хитойда барча турдаги автомобиллар савдоси ўтган йилнинг шу даврига нисбатан 20 фоиздан ортиққа қисқарган. Натижада мамлакатда қарийб 2,5 миллионтага кам автомобил сотилган.
Шу билан бирга, Хитойда автомобил ишлаб чиқариш ҳажмининг пасайиши бор-йўғи 6 фоизни ташкил этган ва ортиқча маҳсулот экспортга йўналтирилган.
Экспорт рекорд суръатда ўсди
Маълумотларга кўра, Хитойнинг умумий автомобил экспорти 65 фоизга ошган.
Электромобиллар экспорти эса янада юқори суръатда ўсиб, 120 фоизга кўпайган.
