Хотин-қизларнинг бизнес лойиҳаларини қўллаб-қувватлаш учун 2 трлн сўм йўналтирилади
Президентнинг тегишли қарори билан хотин-қизларнинг касб-ҳунар ўрганиш имкониятларини кенгайтириш белгиланди.
3 декабр куни президентнинг «Хотин-қизларни қўллаб-қувватлашга оид қўшимча чора-тадбирлар тўғрисида»ги ПФ–240-сонли фармони қабул қилинди.
Унга кўра, маҳаллаларда хотин-қизларнинг бандлигини таъминлаш ва саломатлигини мустаҳкамлаш марказлари фаолиятини кенгайтириш фармоннинг асосий мақсадларидан этиб белгиланди.
Шунингдек, 2026–2027 йилларда «HAMROH» хотин-қизлар тадбиркорлигини қўллаб-қувватлаш компанияси» МЧЖ (Компания) томонидан 6 минг нафар хотин-қизларнинг тадбиркорлик лойиҳаларини молиявий қўллаб-қувватлаш учун 2 трлн сўм йўналтирилади. 2,8 минг нафар хотин-қизларни тадбиркорликка ўқитилади. Шу жумладан, 2 минг нафар хотин-қизларнинг тадбиркорлик фаолиятига ҳамроҳлик қилиш асосида кўмаклашилади.
Бундан ташқари, 2026 йил 1 январдан тижорат банклари томонидан таъсисчилари таркибида аёллар улуши 50 фоиз ва ундан юқорини ташкил қилган ва (ёки) раҳбари аёл киши бўлган кичик ва ўрта тадбиркорлик субъектларининг камида 10 та иш ўрни яратишни назарда тутувчи лойиҳаларига Марказий банкнинг асосий ставкасидан 10 фоиз пункт юқори ставкагача БҲМнинг 25 минг бараваригача миқдорда кредит ажратиш;
«Бизнесни кафолатлаш миллий компанияси» АЖ томонидан тижорат банклари кредитларининг 70 фоизигача бўлган қисмига кафолат (кафиллик) тақдим этиш.
Дастур доирасида тикланиш ва тараққиёт жамғармаси мазкур Фармонда назарда тутилган маблағларни Компанияга йўналтириш учун «Тадбиркорликни ривожлантириш компанияси» АЖга Марказий банкнинг асосий ставкасида 3 йиллик имтиёзли давр билан 7 йил муддатга ажратади.
