Янгиланган рейтингда қайси банклар юқорилади, қайсилари пасайди?

Иқтисодий тадқиқотлар ва ислоҳотлар маркази 2026 йилнинг III чораги якунлари бўйича «Банклар фаоллик индекси» асосида тижорат банкларининг янгиланган рейтингини эълон қилди.

Тадқиқотга Ўзбекистондаги 34 та тижорат банки киритилган. Уларнинг 20 таси йирик, 14 таси эса кичик банклар гуруҳида баҳоланган.

Индекс банклар фаолиятини 7 та йўналиш бўйича бирлаштирилган 27 та субиндикатор асосида баҳолайди. Жумладан, молиявий воситачилик ва молиявий оммабоплик, капитал етарлилиги, активлар сифати, бошқарув самарадорлиги, даромад олиш салоҳияти ҳамда ликвидлилик кўрсаткичлари ҳисобга олинади.

Баҳолашда банкларнинг кўрсаткичлари банк тизими бўйича ўртача натижалар ва халқаро меъёрлар, жумладан, Банк назорати бўйича Базель қўмитаси талабларига таққосланади.

Йирик банклар рейтингида кимлар юқорилади?

2026 йилнинг III чорагида 20 та йирик банкдан 10 тасининг умумий рейтингдаги ўрни ўзгармаган. Бешта банк юқорига кўтарилган, яна бештаси пасайган.

Дастлабки тўртта ўрин сақланиб қолган. «Kapitalbank», «Hamkorbank», «Asia Alliance Bank» ва «Trastbank» йирик банклар рейтингининг етакчилари бўлиб қолмоқда.

Шу билан бирга, «Ipak Yo‘li Bank» уч поғона юқорилаб, кучли бешликка кирган. Энг юқори ўсиш ҳам ушбу банк ва «Xalq banki»да кузатилган — ҳар иккиси рейтингда уч поғонага кўтарилган.

Аксинча, «Ipoteka bank» ва «Anorbank» уч поғонадан пасайган. Бу йирик банклар орасидаги энг сезиларли пасайиш бўлган.

Банклар фаолиятининг қайси йўналишларида ўзгаришлар кузатилди?

Индекснинг алоҳида йўналишлари бўйича натижалар банклар фаолиятидаги турли тенденцияларни кўрсатмоқда. Энг юқори ижобий динамика молиявий оммабоплик ва молиявий воситачилик йўналишларида қайд этилган. Капитал етарлилиги ва активлар сифати бўйича эса ўз ўрнини йўқотган банклар сони яхшиланган банклар сонидан кўп бўлган.

Молиявий оммабоплик. Ушбу йўналишда 9 та йирик банкнинг натижаси яхшиланган, 5 тасиники пасайган, 6 таси эса ўз ўрнини сақлаб қолган.

«Asia Alliance Bank» уч поғонага кўтарилиб, энг яхши ўсишни қайд этган. «O‘zbekiston Milliy banki» ва «Asakabank» икки поғонадан юқорилаган. «Tenge Bank» эса етти поғона пасайган.

Молиявий воситачилик. Етти банк юқорилаган, олтитаси пасайган, яна еттитаси аввалги ўрнини сақлаб қолган.

«Mikrokreditbank» беш поғонага кўтарилиб, энг юқори ўсишни кўрсатган. «Ipak Yo‘li Bank» уч, «Davrbank» эса икки поғона юқорилаган. «Turonbank» саккиз поғона пасайиб, ушбу йўналишда энг катта пасайишни қайд этган.

Активлар сифати. Олти банкнинг кўрсаткичи яхшиланган, саккизтасининг ўрни пасайган, олтитаси эса ўз позициясини сақлаб қолган.

«Trastbank» беш поғона, «Asakabank» уч поғона юқорилаган. «Biznesni rivojlantirish banki» уч поғона пасайган. «O‘zsanoatqurilishbank» ва «Aloqabank» эса икки поғонадан йўқотган.

Капитал етарлилиги. Олти банк юқорилаган, саккизтаси пасайган, яна олтитаси аввалги ўрнида қолган.

Энг катта ўсиш «Tenge Bank»да кузатилиб, у бирданига 10 поғона юқорилаган. «Turonbank» уч поғона кўтарилган. «Ipak Yo‘li Bank», «Mikrokreditbank» ва «Biznesni rivojlantirish banki» эса тўрт поғонадан пасайган.

Бошқарув самарадорлиги. Ушбу йўналиш бошқа кўрсаткичларга нисбатан барқарорроқ бўлган: 20 та банкдан 13 таси ўз ўрнини сақлаб қолган, 3 таси юқорилаган, 4 таси эса пасайган.

«Kapitalbank» икки поғона кўтарилган. «O‘zbekiston Milliy banki» ва «Asakabank» бир поғонадан юқорилаган. «Orient Finans Bank», «Xalq banki», «Davrbank» ва «Agrobank» эса бир поғонадан йўқотган.

Даромад олиш салоҳияти. Фақат иккита банк ўз ўрнини яхшилаган, тўрттаси пасайган, 14 таси эса аввалги позициясини сақлаб қолган.

«Xalq banki» ва «Turonbank» икки поғонадан юқорилаган. «Kapitalbank», «Ipoteka bank», «Asakabank» ва «Agrobank» эса бир поғонадан пасайган.

Ликвидлилик. Олти банк юқорилаган, еттитаси пасайган, яна еттитаси ўз ўрнини сақлаб қолган.

«Asakabank» тўрт поғонага кўтарилиб, энг яхши натижани қайд этган. «Trastbank», «O‘zbekiston Milliy banki», «Davrbank» ва «Biznesni rivojlantirish banki» икки поғонадан юқорилаган. «Infinbank» тўрт, «Anorbank» эса уч поғона пасайган.

Кичик банклар орасида «Garant Bank» кескин юқорилади

Кичик банклар гуруҳида ҳам рейтингдаги ўзгаришлар кузатилган. 14 та банкдан 10 тасининг позицияси ўзгарган: бештаси юқорилаган, бештаси пасайган, тўрттаси эса аввалги ўрнини сақлаб қолган.

Етакчи учлик ўзгаришсиз қолган. «TBC Bank», «Universal Bank» ва «AVO Bank» рейтингнинг дастлабки учта поғонасини сақлаб қолган.

Энг катта ўсишни «Garant Bank» кўрсатган. У бир чоракда олти поғона юқорилаб, 14-ўриндан саккизинчи ўринга кўтарилган.

Аксинча, «Hayot Bank», «Madad Invest Bank» ва «Poytaxtbank» уч поғонадан пасайган.