Япония компанияси Ўзбекистонда йирик қуёш ва энергия сақлаш лойиҳасини амалга оширади
Sumitomo Corporation компанияси Самарқанд ва Бухорода 1 000 МW қувватли қуёш станциялари ва 1 336 MWh батареяли энергия сақлаш тизимини қуришни молиялаштирмоқда. Лойиҳа 2027 йилдан кейин ишга тушади.
Япониянинг Sumitomo Corporation компанияси Ўзбекистондаги энг йирик қайта тикланувчи энергия лойиҳасини амалга ошириш учун молиялаштириш шартномасини имзолади. Лойиҳа доирасида умумий қуввати 1 000 MW бўлган қуёш электр станциялари ва 1 336 мегаватт-соат (MWh) сиғимли батареяли энергия сақлаш тизимлари (БЕСС) барпо этилади. Бу ҳақда компания матбуот хизмати хабар берди.
Мега-лойиҳа Саудия Арабистонининг ACWA Power, Япониянинг Shikoku Electric Power ва Chubu Electric Power компаниялари ҳамкорлигида амалга оширилади. Молиялаштириш жараёнида Япония халқаро ҳамкорлик банки, Осиё тараққиёт банки, Европа тикланиш ва тараққиёт банки ҳамда Ислом тараққиёт банки иштирок этмоқда.
Қуёш станциялари Самарқанд ва Бухоро вилоятларида жойлашади. Ушбу мажмуа ишга тушгач, ҳар йили тахминан 600 минг хонадоннинг электр энергиясига бўлган эҳтиёжини қоплаш имконини беради. Барча ишлаб чиқарилган энергия 25 йиллик шартнома асосида «Ўзбекистон Миллий Электр Тармоқлари» акциядорлик жамиятига сотилади.
Sumitomo корпорацияси баёнотида таъкидланишича, бу лойиҳа Ўзбекистонда қуёш энергияси ва энергияни сақлаш тизимини бирлаштирган энг йирик дастур ҳисобланади. Лойиҳа орқали компания мамлакатнинг энергия тизимини диверсификация қилиш, табиий газга бўлган қарамликни камайтириш ва қайта тикланувчи манбалар улушини оширишга ҳисса қўшади.
Ўзбекистон ҳукумати 2030 йилгача умумий электр қувватининг камида 30 фоизини қайта тикланувчи энергия манбаларидан таъминлашни мақсад қилган. Янги қуёш ва энергия сақлаш лойиҳаси бу йўналишдаги муҳим қадамлардан бири бўлиши кутилмоқда.
