Yaqin Sharqdagi vaziyatning keskinlashishi xavfi tufayli global neft narxlari ko‘tarildi

23-iyul kuni AQSH prezidenti Donald Trampning Hormuz bo‘g‘ozidagi kemalarga hujum qilingan taqdirda Eron infratuzilmasiga zarba berishga tayyorligi haqidagi bayonotlari fonida global neft narxlari ko‘tarildi. Bu haqda CNBC xabar berdi.

Brent neftining sentabr oyida yetkazib beriladigan fyucherslari 2 foizga o‘sib, bir barrel uchun 95,99 dollarga yetdi, WTI shartnomalari esa 1,7 foizga o‘sib, bir barrel uchun 88,27 dollarga yetdi. Bir kun oldin AQSH kemalarga qilingan har qanday hujumga inshootlarni vayron qilish orqali javob berishini ogohlantirgan edi, bunga javoban Eron vakillari mintaqadagi AQSH infratuzilmasiga hujum qilishga va’da bergandi.

HSBC mutaxassislarining ta’kidlashicha, hozirgi narx o‘zgarishi sulhning barbod bo‘lishidan keyin xom neft yetkazib berish bilan bog‘liq yangilangan xavotirlarni aks ettiradi. Ikki tomon o‘rtasidagi sulh iyul oyi boshida, Hormuz bo‘g‘ozidagi kemalarga qilingan hujumlar Vashingtonning javob choralarini yo‘llaganida barbod bo‘lgandi. HSBC vakillarining so‘zlariga ko‘ra, «asosiy masala mintaqada yuk tashishni nazorat qilish bo‘lib qolmoqda», chunki AQSH nazoratidagi Ummon yo‘lagi orqali o‘sib borayotgan yuk tashish Eron tomoni uchun qoniqarsiz.

14-iyul kuni Brent neftining narxi 15-iyundan beri birinchi marta bir barrel uchun 85 dollardan oshdi. «Goldman Sachs» to‘rtinchi chorakda Hormuz bo‘g‘ozi orqali yuk tashishdagi uzilishlar va Qizil dengizdagi ta’minot muammolari tufayli Brent neftining bir barrel uchun 120 dollardan oshishi haqida bashorat qilgan edi. Bankning asosiy prognozida 2026 -yilning to‘rtinchi choragida narx 80 dollar va 2027-yilda 75 dollar bo‘lishi ko‘rsatilgan edi. 

Ma’lumot uchun, fyucherslar — bu aktivni kelajakda belgilangan narxda sotib olish yoki sotish shartnomalari. Neft bozorida ular xavfni himoya qilish vositasi sifatida ishlatiladi va treyderlarga siyosiy va iqtisodiy yangiliklarga javob berish bilan birga yetkazib berish narxlarini belgilash imkonini beradi.

Eslatib o‘tamiz, avvalroq AQSH Eronga va neft tankeriga zarba berdi, Tehron esa Quvayt va Iordaniyaga hujum qildi.