Европа узоқ давом этган тинчликдан сўнг урушга тайёргарлик кўришга чақирмоқда

Европада сўнгги ойларда хавфсизлик масалаларига оид риторика кескин ўзгарди. The Wall Street Journal нашрига кўра, Европа етакчилари ва хавфсизлик идоралари аҳолини Россия томонидан эҳтимолий ҳарбий таҳдидга тайёр бўлишга чақирмоқда. Бу каби огоҳлантиришлар ўн йил аввал деярли тасаввур қилиб бўлмас эди.

Бу ўзгариш АҚШ президенти Доналд Трамп маъмуриятининг Украина бўйича тинчлик келишувига эришиш уринишлари фонида юзага келмоқда. Европа пойтахтларида эса эҳтиёткорлик ортиб бормоқда: айрим доиралар фикрича, эҳтимолий муроса Москва позицияларини мустаҳкамлаб, НАТО ва Европа Иттифоқи мамлакатлари учун тўғридан тўғри хавф туғдириши мумкин.

Германия канцлери Фридрих Мерц Россия президенти Владимир Путиннинг Украинадаги ҳаракатларини 1938 йилдаги Ҳитлер сиёсати билан таққослади. Унинг таъкидлашича, Украина қулаши Россия экспансиясини тўхтатмайди. НАТО бош котиби Марк Рютте эса «можаро остонада турибди», дея огоҳлантириб, Россия беш йил ичида НАТОга қарши куч ишлатишга тайёр бўлиши мумкинлигини билдирди.

Хавотирлар АҚШ позициясидаги ноаниқлик билан янада кучайган. Вашингтоннинг янги миллий хавфсизлик стратегиясида Россия тўғридан тўғри рақиб сифатида тилга олинмаган. Бу Европа разведка хизматлари баҳоларига зид: Буюк Британия MI6 раҳбари Блез Метревели Москва Европа барқарорлигини издан чиқариш уринишларини давом эттиради, дея таъкидлади.

Европа давлатлари жавоб чораларини кучайтирмоқда. Франция ва Германия мажбурий ҳарбий хизматни кенгайтиришни муҳокама қиляпти, НАТОнинг Европа аъзолари эса 2035 йилга қадар мудофаа харажатларини ЯИМнинг 3,5 фоизига етказишга келишиб олди. Германия эса армия ва инфратузилмага 1 трлн доллардан ортиқ сармоя киритишни режалаштирмоқда.

Аввалроқ Россия президенти Владимир Путин Украинадаги уруш учун жавобгарлик Москва эмас, балки Ғарб давлатлари зиммасида эканини таъкидлагани ҳақида хабар берган эдик.