Европада газ нархи рекорд даражага чиқди
Европа қишки мавсумда газ танқислиги хавфига яқинлашмоқда: таъминот қисқариши ва захиралар пастлиги нархларни кескин оширди.
© Ijtimoiy tarmoqlarЕвропада суюлтирилган табиий газ нархи 2023 йил январидан бери энг юқори даражага кўтарилди. Бу ҳақда «The Financial Times» хабар берди.
«Argus Media» маълумотларига кўра, ҳафта бошида харидорлар газнинг 1 миллион Британия иссиқлик бирлиги учун 22,83 доллардан тўлаган. Бу кўрсаткич бир йил аввалги нархдан икки баробардан кўпроқ юқори ҳисобланади.
Европа бозоридаги газ нархлари нефть қийматига қараганда кучлироқ ошган. Нефть нархи ҳам йил бошидан буён ўсган бўлса-да, газ бозоридаги босим анча сезиларли бўлган.
«The Financial Times» Европа қишки даврда таъминот танқислигига тайёрланаётганини қайд этган. Айниқса, Яқин Шарқдан келадиган суюлтирилган газ ҳажмининг қисқариши вазиятни мураккаблаштирмоқда.
Захиралар паст даражада
Яқин Шарқдаги уруш бошланишидан олдин Европада газ захиралари одатдагидан паст даражада бўлган. Бу эса ташқи таъминотдаги ҳар қандай узилишга минтақани янада таъсирчан қилиб қўйган.
Германияда газ омборларининг умумий тўлганлик даражаси ҳозир 50 фоизни ташкил этмоқда.
«Gas Infrastructure Europe» маълумотларига кўра, август ойида Европада газ захираларига соф қуйиш ҳажми суткасига ўртача 3 тераватт-соат бўлган. Бир йил аввал эса ушбу кўрсаткич кунига 3,6 тераватт-соатни ташкил этган.
