АҚШда Россияга қарши «дўзах» санкциялари эълон қилинди

Оқ уй матбуот хизматининг хабар беришича, мазкур ҳужжат Россияга нисбатан қонуний санкциялар, тарифлар ва бошқа турдаги тақиқларни жорий этиш ҳамда кенгайтириш ваколатларини белгилаб беради. Шунингдек, у Эронга қарши амалдаги санкциялар муддатини ҳам узайтиради.

АҚШ ҳукумати томонидан эълон қилинган қонуннинг якуний матнида Россияга қарши кўриладиган чоралар алоҳида бўлим сифатида жой олган.

Хусусан, ҳужжатда амалдорлар, Россия ҳукуматига алоқадор ёки уни қўллаб-қувватловчи айрим шахслар, шунингдек, молия институтлари ва энергетика соҳасига нисбатан тегишли чоралар кўзда тутилган.

Бундан ташқари, Россия нефти ва газини ташишда қатнашаётган кемалар ҳамда санкцияларни айланиб ўтишга кўмаклашаётган хорижий шахслар ҳам ушбу чекловлар таъсирига тушади.

Россия амалдорлари ва айрим олигархларга қарши санкциялар

Қонунга кўра, ҳужжат кучга кирганидан сўнг президент 30 кун ичида Россия ҳукуматига алоқадор айрим шахслар ва кемалар рўйхатини кўриб чиқиши ҳамда қонунда белгиланган тоифаларга кирувчиларга нисбатан санкциялар жорий этиши лозим. Бундай текширув жараёни ҳар 180 кунда мунтазам ўтказиб борилади.

Мазкур қонунда санкция қўлланилиши мумкин бўлган шахслар қаторига Россия президенти, бош вазири, шунингдек, мудофаа, ташқи ишлар, транспорт, молия, саноат ва савдо, энергетика ҳамда қишлоқ хўжалиги вазирлари каби юқори лавозимли амалдорлар киритилган. Шу билан бирга, айрим россиялик олигархлар ҳам ушбу чекловлар доирасига тушиши мумкин.

Янги ҳужжатда хорижий шахсларга нисбатан ҳам тегишли санкциялар назарда тутилган. Хусусан, Россия мудофаа саноати учун муайян товар ёки хизматларни атайлаб етказиб берган, Россия қуролли кучлари билан йирик операцияларни амалга оширган ёхуд АҚШ санкцияларини айланиб ўтишга кўмаклашган хорижликлар ҳам шундай қатъий чораларга дуч келиши белгилаб қўйилган.

Россия нефти ва газини сотиб олувчи давлатларга 100 фоизгача бож

Яна бир муҳим банд Россия нефти ёки газини сотиб олувчи айрим хорижий давлатларга тааллуқли.

Қонун лойиҳаси Трампга Россия нефть ва газининг энг йирик бешта харидорига, хусусан, Хитой ва Ҳиндистонга 100 фоизгача божларни ундириш бўйича кенг ваколатлар беради.

2022-йил декабрдан 2026-йил августгача Россия хом нефт экспортининг 50 фоизи Хитой, 37 фоизи Ҳиндистон ҳиссасига тўғри келган. Туркия ва Европа Иттифоқининг улуши эса 5 фоиздан бўлган.

«Соя флоти» ҳам нишонга олинди

Қонун Россия нефти, гази ва бошқа маҳсулотларини санкцияларни четлаб ўтиш мақсадида ташишда фойдаланиладиган хорижий кемаларга ҳам тааллуқли.

Жумладан, Россия нефт ва газини ташишда қўлланадиган, санкцияларни четлаб ўтишга ёрдам берадиган, етарли денгиз суғуртасига эга бўлмаган ёки нефт учун белгиланган нарх чегарасини айланиб ўтаётган кемалар қонунда назарда тутилган санкциялар доирасига кириши мумкин.

Бундай кемаларнинг эгалари, операторлари ва уларга суғурта хизматлари кўрсатувчи айрим хорижий шахслар ҳам санкцияга тушади.

Россия товарларига 500 фоизгача бож

Қонуннинг энг кескин бандларидан бири Россиядан АҚШга импорт қилинадиган товарларга тегишли.

Ҳужжатнинг 112-моддасига кўра, президент қонун кучга кирганидан кейин 30 кундан кечиктирмай Россиядан АҚШга олиб кириладиган барча товарлар учун бож ставкасини 500 фоизгача ошириши керак.

Бу рўйхатга нефт, табиий газ, суюлтирилган табиий газ, нефт маҳсулотлари, нефт-кимё маҳсулотлари, кўмир ва бошқа товарлар ҳам киритилган. Қонунда бу бож бошқа амалдаги бож, йиғим ва солиқларга қўшимча равишда қўлланиши мумкинлиги ҳам кўрсатилган.