Asia Alliance Bank ва EEFU кичик ва ўрта бизнесни молиялаштириш учун 10 млн АҚШ доллари миқдоридаги битимни имзолади
Asia Alliance Bank ва Ўзбекистон иқтисодий имкониятларини кенгайтириш жамғармаси (Economic Empowerment Fund for Uzbekistan, EEFU) 10 млн АҚШ доллари миқдоридаги молиялаштириш линияси жалб этиш тўғрисидаги битим имзоланганини эълон қилди. Маблағлар кичик ва ўрта бизнес субъектларининг исломий молиялаштириш хизматларидан фойдаланиш имкониятларини кенгайтиришга йўналтирилади.
Ҳужжат банк бош офисида Asia Alliance Bank Бошқаруви раиси Умид Абдуазимов ҳамда EEFUнинг Жанубий Кавказ ва Марказий Осиё минтақаси бўйича директори Армандс Фомицевс томонидан имзоланди.
Жалб қилинган маблағлар исломий молиялаштириш тамойиллари асосида фаолият юритувчи тадбиркорлар ва кичик ҳамда ўрта бизнес лойиҳаларини қўллаб-қувватлашга йўналтирилади. Янги молиялаштириш линияси банкка мижозлар учун янги маҳсулотлар қаторини кенгайтириш, шунингдек, мамлакатда тадбиркорликни ривожлантиришга ҳисса қўшиш имконини беради.
Asia Alliance Bank изоҳи
Asia Alliance Bank Бошқаруви раиси Умид Абдуазимов шундай деди:
«Asia Alliance Bank учун исломий молиялаштиришни ривожлантириш стратегик йўналишлардан бири ҳисобланади. EEFU билан ҳамкорлик нафақат молиявий ресурсларни жалб этиш, балки тадбиркорлар учун янги имкониятларни яратиш демакдир. Ушбу ҳамкорлик туфайли биз кичик ва ўрта бизнес вакилларига халқаро стандартларга мос, Ўзбекистон иқтисодиётининг барқарор ривожланишига хизмат қилувчи замонавий молиялаштириш ечимларини таклиф эта оламиз».
Asia Alliance Bank ҳақида
Asia Alliance Bank 2009 йил 15 августда ташкил этилган бўлиб, қисқа вақт ичида янги тижорат банкидан Ўзбекистоннинг етакчи молиявий институтларидан бирига айланди. Замонавий технологияларни жорий этиш, маҳсулотлар қаторини кенгайтириш ва хизматлар сифатини мунтазам ошириб бориш орқали банк бугунги кунда бутун мамлакат бўйлаб минглаб жисмоний шахслар ҳамда бизнес вакиллари учун ишончли молиявий ҳамкор ҳисобланади.
EEFU ҳақида
Ўзбекистон иқтисодий имкониятларини кенгайтириш жамғармаси (Economic Empowerment Fund for Uzbekistan, EEFU) — устав капитали 100 млн АҚШ долларини ташкил этувчи жамғарма бўлиб, Ўзбекистон Республикаси Ҳукумати, Ислом тараққиёт банки ва Саудия Арабистонининг бир гуруҳ инвесторларининг ҳамкорлигида ташкил этилган. Жамғарма фаолияти кичик ва ўрта бизнесни қўллаб-қувватлаш, янги иш ўринларини яратиш ҳамда исломий молиялаштириш воситалари орқали мамлакатнинг барқарор иқтисодий ривожланишига кўмаклашишга қаратилган.
Мазкур битимнинг имзоланиши Asia Alliance Bankнинг халқаро ҳамкорликни ривожлантириш, узоқ муддатли молиявий ресурсларни жалб қилиш ва бизнесни молиялаштириш имкониятларини кенгайтиришга қаратилган стратегиясини амалга оширишдаги навбатдаги муҳим қадам бўлди.
Банк халқаро молия институтлари билан ҳамкорликни изчил ривожлантириш орқали мижозларига замонавий ва самарали молиявий ечимларни тақдим этишда давом этади.
