“Атрофимдагилар мени алдашди” — “Real Sanjik” иши бўйича судда учинчи кун

17 апрел куни ЖИБ Мирзо Улуғбек туман судида “Real Sanjik” иши бўйича учинчи суд мажлисида дастлаб, судланувчи Санжар Каримов ўзига қўйилган айблов ЖКнинг 112 моддаси бўйича кўрсатма берди.

Каримовга кўра, 2024 йил 7 август куни  Олимбоевларнинг уйи унинг номига расмийлаштирилган. Август охирида унинг ёнига ушбу оила келиб, қизининг бўлажак эри йўқолиб қолганини ва уларга катта миқдорда пул билан зарар етказганини айтган.

“Мен нотариусда ўз пулларимни уйга алмаштирдим. Раҳматулло, Шаҳзод менга 2 та автомобил қолдирган эди. Машиналар эгаларидан бири машина меники эди, менга машинани қайтариб беринг, деб айтди телефон қилиб. “Техпаспорт”ини қарасам, ростдан ҳам шу одам. У “ака, машинамни қайтариб бермасангиз, мен “угон” қиламан ва сизни “угон”га тортади”, деб айтди. Қонун доирасида машина ахир унга тегишли. Шу сабабли мен бериб юборишга мажбур бўлдим, ўзидан тилхат ҳам ёздириб олдим. Юзлаштирув пайтида ҳам Феруза Раҳматуллаевага ҳам Абдусамад деган йигит савол берган, ўтган ишда. Сиз, ўғлингиз миниб юрган машинани олиб кетганмисиз деганда, “ҳа” деб у олиб кетганлигини Раҳматуллаевага ҳам айтиб ўтган. Шундан сўнг ўзига тегишли бўлган автомобил, БМW М3 ни ташлаб кетяптида менга, “техпаспорт”да ўзига тегишли, ўзининг номида. Менга бир инсон телефон қилиб айтяптики, у машина мен сотиб олганман, деди. Мен айтяпманки, қанақа қилиб, агар “техпаспорт”да, ҳужжатида машина унга тегишли бўлган бўлса, сизга эмас деса, “ака, мен келайин олдингизга”, деб келиб, тилхат билан олди-сотдини ҳам кўрсатиб, сизга тақдим этамиз. Айтяптики, мана мен бу машинани сотиб олганман, деб. Яъни, менга ташлаб кетган пайтида Шаҳзод машинани ўзи сотиб ҳам бўлган экан. Кейин Олимбоевлар оиласи келяпти. Бизни алдаб кетди Рисматов деб. Бу ердан ташлаб кетган иккита машина ҳам йўқ. Атрофимдагилар мени алдашаётганини тушуна бошлаяпман. Мен ўзимнинг пулимга ташвишлана бошладим”, дейди судланувчи Санжар Каримов.

Унинг қўшимча қилишича, Олимбоевалар унинг олдига келади. Улар Рисматовнинг онаси Феруза Раҳматуллаева уйини сотиб, пулини қилиб беришини айтади. Улар Рисматов қаердалигини аниқлаш учун Раҳматуллаеванинг телефон рақамини берган. Судланувчи ундан аввал Феруза Раҳматуллаеванинг телефон рақамини билмагани, ҳаётда ҳеч қачон таниш бўлмаганини айтди.

“Суҳбат давомида Феруза Раҳматуллаева айтяптики: мен ҳозир уйимни сотганман. У Шаҳло Олимбаеванинг қизи Жамилага тушунтирган, уйини сотиб, ўша 200 минг долларни уларга бериб юбораман деган. Аммо, ҳозир уйи гаровга қўйилгани, ноябргача 500 минг оламан деган жойи бор. Мен эътироз билдирганим, мен бу ишни ноябргача кутолмайман. Мен ноябргача ё бу оила аъзоларини сизларнинг уйингизга жўнатиб юборишга мажбур қиламан ёки нимадир, сиз қандайдир чора кўришингиз керак эди. Мен жаҳл устида, мени ўзимдан чиқаришди, мен катта миқдордаги пулни йўқотишдан қўрқувда эдим. Ва шунинг учун бизнинг Раҳматуллаева билан суҳбатимизда оғзаки жанжал келиб чиқди”, дейди судланувчи Санжар Каримов.

Судланувчи оғзаки жанжал айнан ҳақоратлардан бошланганини айтди. У Феруза Раҳматуллаевани ҳақорат қилганини тан олиб, ўша суҳбатдан кейин ундан бир неча бор кечирим сўраганини билдирди. Каримов Раҳматуллаева билан ҳаётда икки марта кўришганини қўшимча қилди. Суд мажлисида барчадан ҳақорат учун яна бир бор кечирим сўради. У ҳақорат қилганини қаттиқ жаҳл устида бўлгани билан изоҳлади.

“Ўша пайтда катта миқдордаги пулни йўқотаётганимдан келиб чиққан ҳиссий  эффеcт ҳолатимни таърифлаб бўлмасди. Ўша суҳбатда менинг асосий эътиборим пулда эди, тушуниб турибсизки, атрофимдагилар мени алдашаётганди. Мен пул берганим етмагандек, қўшимчасига ҳозирги пайтда панжара ортидаман. Менинг ғазабимнинг сабаби — бу пул миқдори эди. Илтимос, тушунинг. Менинг ҳиссий зиддиятимнинг агрессияси, буларнинг барчаси Раҳматуллаева ўшанда пул бермайман деб айта бошлаганидан кейин, бизнинг суҳбатимиздан сўнг юзага келди. Раҳматуллаева билан суҳбатимизни ёзиб олишаётганини билмагандим. Мен Раҳматуллаева билан олдин таниш бўлмаганман. Мен ҳатто қаерда яшашини билмайман, ҳаётда учратмаганман. Бир йил-у уч ойдан кейин судда кўришганмиз. Бир метр масофада ўтирганимизда Феруза бўлишини айтди.

Мен чин юракдан, чуқур кечирим сўрайман, мана яна бир бор Феруза Раҳматуллаевага қараб туриб айтаман. Менда сизга нисбатан ҳеч қандай ҳаракатлар, ҳеч қандай ғазаб бўлмаган. Фақат ўша пайтда менинг ҳиссий ҳолатим фақат ғазабдан, ҳақоратлардан иборат эди. Буни инобатга олишингизни сўрайман. Бундан ташқари, шуни инобатга олишни истардимки, менинг мақсадим суҳбат пайтида фақат ўз пулларимни қайтариб олиш эди. Мен фақат ўз пулларимни сўрадим. Мен фақат унинг ўғли қаердалигини сўрадим. Мен, ростдан ҳам, унинг ўғли қаердалигини билмасдим. У айтаётган суҳбат, қандайдир 700 000 доллар... Ахир бу бошқаларнинг қарзи. Бошқа-бошқа болаларнинг қарзи, қарз болаларники-ку. Мен у бошқа қарз олган болаларни танимасдим ҳам, танимайман ҳам. Мен Рисматов йўқолиб қолгандан кейин мана бу одамдан бунча қарз, бу одамдан бунча қарз, у одамдан бунча қарз деб эшитдим. Менинг руҳий ҳаяжоним мени алдашгани туфайли эди, ҳурматли раис этувчи.

Келинг, бироз реалист бўлайлик. Раҳматуллаева билан телефон суҳбатидан бошқа қандай ҳаракатлар ёки ниятлар бор? Мен уни ҳаётда кўрмаган бўлсам, мен у билан олдин таниш бўлмаган бўлсам, яна бир бор айтаман, ғазаб пайтида мен жаҳлда эдим. Чунки унинг ўғли қолдирган иккита машинани эгалари олиб кетишди. Бу факт-ку. Бошқа оила келиб, “У бизни алдади”, деяпти. Мен уларни уйдан қандай чиқариб юбораман? Бу бутун бошли оила-ку. Оила ҳам Раҳматуллаева билан бир неча марта гаплашиб кўришга ҳаракат қилган. Шу асосда мен ҳам гаплашиб кўришга ҳаракат қилдим. Аммо менда суҳбат ўхшамади”, дейди судланувчи Санжар Каримов.

Каримов адвокатнинг саволига жавобан, у томондан Феруза Раҳматуллаевага ҳеч қандай босим бўлмаганини таъкидлади. Ўша телефон суҳбати пайтида Шаҳзод Рисматов қаерда эканлигини билмагани, Дубайда ушланиб, терговда эканлигида хабар топганини қўшимча қилди.

Адвокат Ашурова Феруза Раҳматуллаеванинг телефон рақамини қаердан олгани ва кимнинг телефонидан қўнғироқ қилганини сўради. Судланувчи Каримов Раҳматуллаеванинг рақамини Шаҳло Олимбаева ва Жамила Олимбаева берганини айтди.

“Биз пулимизни ололмаяпмиз Шаҳзоддан. Шаҳзод уйимизни сотиб, пулини олиб кетди, “еб кетди”. Биз уйимизни ололмаяпмиз. Бизни ҳар куни “эрта, эрта, эрта” деб, “мана бу уйимни сотганман, мана бу уйимни сотганман” деб, алдаяпти. Ўзингиз мана гаплашиб кўринг, ўзингиз ойдинлик киритиб беринг, уйни сотиш нияти борми, йўқми, уйни сотмоқчими? Бизни пулимизни бериш нияти борми? Бошида, суҳбатнинг бошида обший, уйни анави Жамилага 200 минг бериб юбораман, деб айтиб турибди. Кейин бизда “словесний перепалок” бўлгандан кейин, бекорини қилиб, қаердан нима қилиб олсанг, олавер, деган мазмунда жавоб бергандан кейин, қанақа қилиб мен… Мен бу одамларни уйдан ҳайдаб юбормасам, иккита машина йўқ бўлса, мени номимда эмас. Қанақа қилиб, кимдан пулимни олишимни билмай дод-вой қилиб, “эмоционалний портлаш” бўлганда менда”, дейди Каримов.

Суд мажлисида Жамила Олимбоева гувоҳ сифатида чақирилиб, кўрсатма берди

“2023 йилда Шаҳзод Рисматов билан танишганман. Шундан кейин бир неча марта уйимга совчи жўнатган. Ўша пайт “Малика” бозорига ҳар хил техника, телефон, iPhone'лар олиб келаман, деб айтар эди. Бундан кейин 2024 йил ёзда Феруза опа Раҳматуллаева оиласи билан уйимизга совчиликка келдилар, оқ ўрар қилишди. Кейин август ойида “ЗАГС”га топширдик. Секин тўйга ҳаракат бошлаганмиз. Келин-кўйлак қидиришни бошладим. Кейин Шаҳзоднинг оналари бориб, тўйхонага пул тўлаб бўлганлар. Хуллас, бизда ҳамма нарса тайёр эди. Кейин август ойида Саҳзод кайфиятсиз юришни бошлади. Энди “ЗАГС”га топширгандан кейин врачларга қатнашиш керак-ку, биз фақат иккита врачга боришга улгургандик. “Қачон борамиз қолган врачга?” дедим. “Ҳозир энди бир-иккита муаммоларим чиқиб қолди”, деди. “Нима муаммо?” десам, “Бир-иккита бизнесга пул тиккан акалар,  тўйга озгина қолганда пул талаб қилишяпти”, деди. Битта машинангизни сотинг, дедим. Ўшанда БМW ҳайдарди. “Йўқ, мен сотолмайман. Сен тушунмайсан, агар БМWъларни тезда сотаман деб эълон берса, арзонга олишади”, деган гапни айтди. Кейин шу билан кайфиятсиз юраверди”, дейди гувоҳ Олимбоева.

Кейин Олимбоеванинг отаси Олимбоев бўлажак куёв Рисматовни уйига чақиради. 6 августда Шаҳзод Рисматов уларнинг уйига келади. Қизнинг отаси Шаҳзод Рисматовдан нима муаммолар бўлаётганини сўрайди. Шаҳзод тахминан саккиз-тўққиз кунда унга пул келиши кераклиги, лекин ҳозир ишим чўзилиб кетаётганини айтади. Бир-икки акалар пул сўраётгани, уларга пул бериб юбормаса, тўй қилишига ҳам қўйишмайди, деб тушунтиради. Кейин ота бўлажак куёвга тўй бўлишини ҳаммага эълон қилиб бўлингани айтган. Шунда Шаҳзод Санжар деган акаси борлиги, ўша пул берадиган бўлганини айтади. Бу гапдан ота хурсанд бўлади. Санжар Каримов шунчаки пул бермаслигини, гаровга унинг номига нимадир қўйиш кераклигини қўшимча қилади.

Рисматов бўлажак қайнота-қайнонасини ўз таниши Санжар пул беришга тайёр эканига ишонтирган, аммо фақат уйни гаровга қўйиш шарти билан. Қизнинг отаси узоқ иккиланса-да, охир-оқибат бўлажак куёвнинг гапларига ишониб рози бўлган.

7 август куни соат 15:00 да оила Яккасарой тумани нотариусига чақирилган. Шу ерда Жамила биринчи бор Санжар Каримовни кўрган.

“Кейин ҳужжатлар тарқатилди. Мен ўзимникини олганимда, унда "олди-сотди" деб ёзилган эди. Отам онамга қараб: “Онаси, бу ерда олди-сотди деб ёзилган", деди. Биз Шаҳзодга қарадик. У: “Қўл қўяверинглар, ҳеч нарса бўлмайди”, деди. Ва биз ишониб, яхши ният билан имзо қўйдик”, дейди гувоҳ Олимбоева.

Олимбоевага кўра, нотариусдан чиққанларидан сўнг Каримов ва Рисматов икки ҳафтадан кейин шу ерда учрашиб, “ҳаммасини ўз жойига қайтариш”га ваъда беришган. Бироқ кечқурун куёв уй учун атиги 150 минг доллар берилганини, яна 70 минг долларни эса икки дона БМW гарови эвазига олганини айтган.

Жамиланинг кўрсатмаларига кўра, пул нотариусда эмас, балки “Россия” меҳмонхонаси атрофида Иброҳим исмли шахсга берилган. Шу Иброҳим ҳақида Феруза Раҳматуллаева ҳам гапирган. Унинг айтишича, пулни айнан Каримовнинг ўзи ушбу воситачига беришни ташкил қилган ва ҳозир “пулни қайтаришни” талаб қилмоқда. Зарар миқёси катта эканини тасдиқлаш учун ҳимоя томони Раҳматуллаевага тегишли икки уй сотилгани ҳақидаги ҳужжатларни тақдим этган.

Бир неча кундан кейин Рисматов алоқани узган ва тез орада унинг хорижга қочиб кетгани маълум бўлган.

Кейинчалик оила судланувчи Каримов Дубайга бориб, Рисматовнинг онасига тегишли мулкни ўз номига ўтказганини билиб қолган.

“Кейин Шаҳзодни Дубайда тутишди. Тошкентга олиб келишди. У билан бирга юзлаштирув бўлди. Бошида “танимайман” деди. Кейин озгина вақт ўтгандан кейин, “узр, алдашим керак экан, алдамасам бўлмайди. Шундай қилиш керак. Мен ҳам ўзимни ўйлашим керак”, деди. Даҳшат. Кейин уйга келдим. Онамга бўлган гапларни айтдим. Хафа бўлди.

Кейин 2025 йил суд бошланди. Судда аллақачон мен тушуниб етдим, жуда қийин бўляпти, сал адолатсизликни сезяпман. Санжар Каримов ўша Яккасаройда ҳам, 102 га ёзганимизда ҳам кўрсатма берганлар, менинг дадамга 240 минг доллар пул берганликларини. Энг алам қилгани шу бўлган-да. Чунки уйни ҳам йўқ қилдик, пул ҳам йўқ. Қурол кўтарган ҳолат ҳам бўлган. Кейин интернет тармоқларига видео жойлаштирдим. Бўлган воқеаларни гапириб берганман. Мен ўзим кутмагандим бунақа шов-шув бўлади деб. Ҳеч кимга туҳмат қилмоқчи эмас эдим. Шунчаки адолат талаб қилиб, бизлар ҳақиқатан пул олмаганмиз деб... Шу видеони қўйганимдан кейин анча силжиш бўлди. Судялар алмашди. Шаҳзод ҳам кетди. Энди ҳозир шу нарсани бошимиздан ўтказдик. Менинг ҳеч кимга ҳеч қанақа ёмонлигим йўқ, мисол учун. Мен эрга тегмаган қизман. Ўзимга душман орттирмоқчи эмасман. Оиламда тинч яшагим келяпти”, дейди гувоҳ Олимбоева.

Гувоҳга суд ҳайъати, давлат айбловчиси, айбланувчилар ва уларнинг ҳимоячилари саволлар бериб ўтишди.

Шунингдек, суд мажлисида судланувчи Каримовнинг адвокати Ашуров томонидан илтимоснома киритилди. Унга кўра, судланувчи Каримов ва жабрланувчи Раҳматуллаева ўртасидаги ўзаро суҳбатларининг тўлиқ ҳолатдаги аудиоёзувига нисбатан Каримовнинг ўша вақтдаги психологик ҳолатига баҳо бериш учун судга оид психологик экспертизаси ва унинг айтган сўзларида тажовуз аломатлари бор-йўқлиги, бошқа шахсга нисбатан ўлдириш ёки зўрлик ишлатишнинг реал хавфини юзага келтириш мумкин ёки мумкин эмаслигини ойдинлик киритиш бўйича судга оид лингвистик экспертиза тайинлаш сўралди. Судя Баҳром Бердиев томонидан мазкур илтимосномани қаноатлантиришни рад этиш ҳақида ажрим чиқарди.

Кейинги суд мажлиси 20 апрел куни давом этиб, гувоҳлар сўроқ қилинади.

Журналист Бахтиёр Тўхтаев тайёрлади.