Аукционда шифохона сифатида сотилган объект ўрнида уйлар қурилмоқда

Аукционда шифохона сифатида сотилган объект

Тошкент вилояти Зангиота тумани, Ўртаовул ҳудудидаги Тошкент гўшт комбинати кўчаси 3а-уй манзилида жойлашган собиқ кўп тармоқли шифохона айни пайтда қурилиш майдонига айланган. Ўтган асрнинг 70–80-йилларида қурилган ушбу тиббиёт муассасаси атрофидаги ҳудудда бугун бинолар бузилмоқда, дарахтлар камаймоқда ва кўп қаватли уйлар қурилиши бошланган.

Муаммо шундаки, объект аукционга чиқарилган пайтда унинг асосий фаолияти тиббий хизмат кўрсатиш этиб белгиланган эди. 2025-йил 6-феврал куни собиқ шифохона бошланғич баҳоси 80 фоизга пасайтирилган ҳолда аукционга чиқарилган. Давлат комиссияси қарорига кўра, объектни сотиб олган шахс тиббий хизмат кўрсатиш фаолиятини сақлаб қолиши шарт эди. Савдода фуқаро Шухрат Шукуров ғолиб бўлган. Аҳоли эса шифохона таъмирланиб, қайта ишга туширилишидан умид қилган.

Аҳоли: “Бу ер шифохона деб сотилган”

“Кимошди савдосида бу ер шифохона деб сотилган ўзи асли. Ҳозир уй бошланди. Қанча-қанча дарахтларимиз кесилиб кетди. Шифохона қилиб, қанча-қанча одамлар сарсон, туман марказига қатнаб ётибди”, — дейди маҳаллий аҳоли вакилларидан бири. Унинг айтишича, ҳудудда ичимлик суви, дам олиш ва болалар ўйнаши учун жой билан боғлиқ муаммолар ҳам мавжуд. Шунга қарамай, собиқ шифохона ўрнида кўп қаватли уйлар қурилиши бошлангани аҳолининг норозилигига сабаб бўлмоқда.

Ҳужжатларда нима дейилган?

Аҳолининг эътирозлари ҳужжатларда келтирилган маълумотлар билан ҳам боғлиқ. Давлат активларини бошқариш агентлигининг 2025-йил 22-августдаги хатида объект бўйича тиббий хизмат кўрсатиш фаолиятини сақлаш мажбурияти кўрсатилган. Шунингдек, Давлат кадастрлари палатаси томонидан 2025-йил 8-майда берилган паспортда ердан фойдаланиш тури “амбулатория-поликлиника хизматини кўрсатиш” деб қайд этилган. Аммо кейинги ҳужжатлар вазиятнинг ўзгарганини кўрсатади. Кадастр маълумотларига кўра, объект фуқаро номидан “AVANGARD ORIGINAL” МЧЖ номига ўтказилган. 2025-йил 11-август куни Зангиота тумани қурилиш бўлими томонидан объект ихтисосини ўзгартириш ва уни нотурар жой тоифасидан турар жой тоифасига ўтказиш учун рухсат берилган. 2025-йил 11-декабр куни эса Тошкент вилояти Қурилиш ва уй-жой коммунал хўжалиги бош бошқармаси Архитектура кенгаши ушбу ҳудудда ўрта қаватли кўп хонадонли турар жой мажмуаси қурилишига ижобий хулоса берган. Шу тариқа асосий савол пайдо бўлади: аукцион шартларида тиббий фаолиятни сақлаш мажбурий қилиб белгиланган объект қандай асосда турар жой қурилиши учун мослаштирилди?

“Шифохона ёпилгач, туман марказига боришга тўғри келмоқда”

Бу саволнинг ҳуқуқий жиҳатидан ташқари, ҳудуд аҳолиси учун унинг ижтимоий оқибати ҳам бор. Собиқ шифохонада ишлаган фуқаролардан бири у ерда терапия, хирургия, кардиология ва туғруқхона бўлимлари бўлганини айтади.

“Ўзим шу ерда неча йил ишлаганман шифохонада. Терапия бор эди, хирургия бор эди, кардиология бор эди, туғруқхона бор эди. Ҳаммасини ёпиб, кейин очишмади, харобага айлантиришди. Шифохона қуриб берамиз деб бузиб ташлаб ҳаммасини, энди уй қуриляпти”, — дейди у. Унинг таъкидлашича, шифохонанинг тугатилиши билан аҳоли туман марказидаги тиббиёт муассасаларига мурожаат қилишга мажбур бўлмоқда. Бу эса навбат ва жой етишмаслиги муаммосини келтириб чиқармоқда.

Яна бир фуқаро ҳам маҳалладаги ягона шифохонанинг бузилиб, унинг ўрнига уй қурилаётганидан норозилигини билдиради: “Бизнинг маҳалламиздаги биттагина шифохонани бузишиб, ўрнига уй қуришяпти. Бунга биз норозимиз. 30 минг аҳолига шифохона керак. Туман марказига бориш учун навбат олиш керак экан.”

Қурилиш сабаб поликлиникага ҳам зарар етган

Масала фақат собиқ шифохона биносининг тақдиридан иборат эмас. Ҳозир ҳудудда фаолият юритаётган давлат тиббиёт муассасаларидан бири — 17-сонли оилавий поликлиника ҳам қурилиш жараёнидан зарар кўрган. Қурилиш назорати инспекциясининг 2026-йил 25-июндаги жавоб хатида тадбиркор томонидан биноларни демонтаж қилиш вақтида поликлиниканинг асосий бетон конструкцияларига зарар етказилгани қайд этилган. Инспекция техник хулоса олинмагунча демонтаж ишларини тўхтатиш бўйича кафолат хати олинганини билдирган. Ҳудудда яшовчи ёш она эса қурилишнинг кундалик ҳаётга таъсирини шундай тасвирлайди: “Мана шу болам ҳозир тўрт ярим ёш бўлди. Касалдан боши чиқмайди. Ётмаган шифохонамиз, кўрсатмаган дўхтиримиз қолмади. Бу ерда чанг, ҳамма ёқ. Деразаларимизни очсак, чанг киряпти”. Унинг сўзларига кўра, қурилишдаги шовқин ҳам аҳолига ноқулайлик туғдирмоқда.

“Аввал инфратузилмани ҳал қилишсин”

Маҳалладаги яна бир муаммо — янги қурилишнинг мавжуд инфратузилмага қандай таъсир қилиши. Фуқаролардан бири ҳудудда ичимлик суви, электр, газ ва канализация билан боғлиқ муаммолар борлигини айтади. “Ўзи 29 та уй. Канализация муаммо. Ичимлик суви муаммо, газ муаммо, электр энергияси муаммо. Шунга қарамасдан яна мана бу ерда тўққиз этажли уйларни тиқишяпти шу ерга, касалхонанинг ўрнига”, — дейди у. Унинг фикрича, янги уйлар қурилишидан олдин ҳудуддаги асосий инфратузилма масалалари ҳал этилиши керак.

Бу масала Қурилиш вазирлигининг аҳолига берган жавобида келтирилган маълумотлар билан янада мураккаблашади. 2026-йил 7-июльдаги жавобда объект бўйича расмийлаштирилган ҳужжатларга асосан, унинг негизида тиббий хизмат кўрсатиш фаолиятини сақлаш назарда тутилмагани қайд этилган. Яъни бир томонда — аукцион шартлари ва айрим ҳужжатларда тиббий фаолиятни сақлаш талаби. Иккинчи томонда эса — кейинги қурилиш ҳужжатларида турар жой мажмуасига йўл очилган.

“Шифохона билан бирга яшил ҳудуд ҳам йўқолмоқда”

Аҳолининг эътирозлари тиббиёт билан чекланмайди. Собиқ ходимнинг айтишича, шифохона ҳудудида йиллар давомида катта дарахтлар, арчалар ва бошқа яшил майдонлар бўлган. Ҳозир эса уларнинг бир қисми йўқ қилинмоқда.

“Бу ерда қанчадан-қанча, неча йил олдин экилган катта-катта дарахтлар бор эди, арчалар бор. Менинг ҳам ўзимнинг тўртта неварам бор. Ҳаммаси аллергия. Чанг, тўзон ҳар куни. Арчалар, қанчадан-қанча арчалар, дарахтлар кесилиб кетяпти”. Фуқаронинг айтишича, шифохона нафақат тиббий хизмат, балки ҳудуд аҳолиси учун иш ўринлари ва яшил майдон вазифасини ҳам бажарган.

1975-йилдан бери шу ҳудудда яшашини айтган яна бир фуқаро ҳам илгари маҳалладаги турли ижтимоий объектлар ва яшил ҳудудлар қисқариб борганини таъкидлайди. “Мана энди навбат шифохонага келди. Мана шу шифохона 1973-йилдан бери халққа хизмат қилиб келарди. Ҳозирги кунда Янгийўлдан тўртта маҳалла қўшилиб, 30 мингга яқин аҳоли бўлиб қолди”. У ҳудудда сув, газ ва электр билан боғлиқ муаммолар борлигини таъкидлаб, янги кўп қаватли уйлар қурилиши мавжуд инфратузилмага қандай юклама бериши масаласини кўтарган.

КОМПАНИЯ ҲАҚИДА

Энди бу қурилиш ортида турган компания — “AVANGARD ORIGINAL” МЧЖ ҳақида. Бу ерда эътиборни тортадиган жиҳатлардан бири — компаниянинг ўзи жуда янги.

“AVANGARD ORIGINAL”МЧЖ 2025-йил 21-февралда рўйхатдан ўтган. Унинг асосий фаолият тури — турар жой биноларини қуриш. Устав фонди эса 8 миллиард 100 минг сўмни ташкил этади. Компания раҳбари — Фарход Исамуҳамедов.

Очиқ маълумотларда компаниянинг бундан олдин нечта турар жой мажмуаси ёки кўп қаватли бино қургани ҳақида тасдиқланган маълумот йўқ. Яъни компаниянинг 2025-йилда ташкил этилганини ҳисобга олсак, унинг айнан “AVANGARD ORIGINAL” номи остидаги қурилиш фаолияти тарихи жуда қисқа. Ҳозирча очиқ манбаларда компаниянинг буюртмачи сифатида кўринаётган йирик лойиҳаларидан бири — айнан биз гапираётган собиқ шифохона ҳудудидаги турар жой мажмуаси.

Қурилиш назорати тизимидаги объект паспортида “AVANGARD ORIGINAL” МЧЖ буюртмачи сифатида кўрсатилган. Объект эса ўрта қаватли кўп хонадонли турар жой мажмуаси деб қайд этилган. Қурилишга рухсат 2026-йил 9-июлда берилган. Лойиҳачи — “DDD ABAT” МЧЖ, пудратчи эса “ABDUMALIK FAYZ QURILISH”МЧЖ.

Демак, бу ерда қурилишни бевосита “AVANGARD ORIGINAL”нинг ўзи олиб бораётгани эмас, балки у буюртмачи, қурилиш ишларини эса бошқа пудрат ташкилоти амалга ошираётгани кўринади.

Яна бир муҳим жиҳат: объектнинг ҳужжатларида биноларнинг аниқ қаватлар сони эмас, “ўрта қаватли кўп хонадонли турар жой мажмуаси” деган таъриф берилган. Маҳаллий аҳоли эса ҳудудда тўққиз қаватли уйлар қурилаётганини айтмоқда. Шундай қилиб, компания 2025-йилда ташкил этилган, унинг асосий фаолияти турар жой қурилиши ва ҳозирги объект бўйича буюртмачи сифатида айнан шу компания кўрсатилган.

Аммо бу ерда яна бир савол пайдо бўлади: энди ташкил этилган компания қандай қилиб собиқ шифохона каби йирик объект билан боғлиқ қурилиш лойиҳасининг буюртмачисига айланди?

Асосий саволлар очиқ қолмоқда

Зангиотадаги собиқ шифохона атрофидаги вазият бир нечта саволни кун тартибига чиқармоқда.

Биринчиси — агар объект аукционга чиқарилаётганда унинг асосий фаолияти тиббий хизмат кўрсатиш этиб белгиланган бўлса, кейинчалик уни турар жойга айлантиришга қайси ҳуқуқий асосда рухсат берилган?

Иккинчиси — салкам 30 минг аҳолига хизмат кўрсатган шифохона ўрнида кўп қаватли уйлар қурилиши ҳудуднинг мавжуд сув, электр, газ ва канализация инфратузилмасига қандай таъсир қилади?

Учинчиси — қурилиш вақтида амалдаги 17-сонли оилавий поликлиниканинг конструкцияларига етказилган зарар учун ким жавоб беради?

Тўртинчиси — ҳудуддаги дарахтлар ва яшил майдонларнинг қисқариши бўйича қандай чоралар кўрилган?

Ва ниҳоят, энг асосий савол: давлат мулкини хусусийлаштиришда белгиланган дастлабки шартлар кейинчалик бошқа қарор ва рухсатномалар орқали ўзгартирилиши мумкинми?

Аҳоли шифохона қайта тикланиши, яшил ҳудуд сақланиши ва янги қурилиш мавжуд инфратузилма имкониятларидан келиб чиқиб амалга оширилишини сўрамоқда. Масала бўйича тегишли давлат ташкилотларидан ушбу саволларга ҳуқуқий асослар ва ҳужжатлар билан жавоб кутиб қоламиз.

Бахтиёр Тўхтаев, журналист

Оператор ва монтажчи: Мироқил Хайруллаев