Байденнинг Оқ уйдан кетгандан кейинги ҳаёти қандай кечмоқда?

Оқ уйни тарк этганига 18 ой бўлган 83 ёшли собиқ АҚШ президенти Жо Байденнинг ҳаёти метастатик саратон касаллигини даволаш сабабли кескин чекланиб қолган. Бу ҳақда собиқ ёрдамчилар ва Байденга яқин одамларга таяниб, «The Washington Post» нашри маълум қилди.

Маълумотларга кўра, 2025 йилнинг май ойида, президентлик муддати тугаганидан тўрт ой ўтиб, Байденга суякларга тарқалган простата саратонининг тажовузкор шакли ташхиси қўйилган. Собиқ президент ҳозирда радиация ва гормон терапиясини олмоқда, шунингдек, саратон тери ҳужайраларини олиб ташлаш учун Мохс жарроҳлигини бошдан кечирган.

Даволаниш жараёни ижобий кечаётганига қарамай, касаллик ва муолажалар уни жисмонан заифлаштириб қўйган. Ҳозирда унинг кун тартиби асосан даволаниш, оиласи ва ўз меросини шакллантириш ишларидан иборат.

Жорий йилнинг 17 ноябр куни, АҚШдаги оралиқ сайловлардан икки ҳафта ўтиб, Жо Байденнинг янги мемуарлари нашр этилиши режалаштирилган. Ушбу ҳолат кўплаб демократларни ва собиқ маслаҳатчиларни ташвишга солмоқда. Улар Байденнинг соғлиғидаги муаммолар жамоатчиликка кўриниши 2024 йилги сайловлардаги кескин баҳсларни яна қайта қўзғатишидан хавотирда.

Шунингдек, сешанба куни федерал апелляция суди консерватив «Heritage Foundation» таҳлил марказига махсус прокурор томонидан Байденни «хотираси суст кекса одам» сифатида таърифлашга асос бўлган аудио ва транскриптларни олишга рухсат берди.

Собиқ президентнинг сиёсий мероси ва танқидлар

АҚШнинг амалдаги президенти Доналд Трамп Байденнинг ёши ва ақлий ҳолатини бир неча бор масхара қилиб келмоқда. Жумладан, у Оқ уйдаги Байден портретини авторучка (автопен) суратига алмаштирган. Бу Байденнинг ёрдамчилари унинг ўрнига қарор қабул қилгани ҳақидаги айбловларга ишорадир. Трамп ўз нутқлари ва ижтимоий тармоқларда Байденнинг соғлиғига тез-тез урғу бериб, уни «Уйқучи Жо» деб атаган.

Байденнинг оила аъзолари бундай ҳужумлардан норози. Ўтган ойда Хантер Байден отасининг касаллигини нишонга олган танқидчиларга ижтимоий тармоқларда жавоб қайтарди:

«Отамнинг сиёсати ёқмаслигини ва Fox News гапларига ишониб мени ёмон кўришингизни тушунаман. Майли, бунга эътирозим йўқ, лекин отам саратон билан курашяпти. Қандай қилиб бундан ҳужум қуроли сифатида фойдаланиш мумкин? Шуни ўзингизга эп кўришингиз учун қанчалик тубан (ёки кўр) бўлишингиз керак?», — деб ёзди у.

Жамоатчилик олдида чиқишларини чеклаган

Байденнинг Делавэрдаги президентлик кутубхонаси учун маблағ йиғиш жараёни ҳам қийин кечмоқда. Жамғарма 2027 йил охиригача бор-йўғи 11 миллион доллар йиғишни кутмоқда. Бу Жимми Картер, Билл Клинтон, Жорж Буш ва Барак Обама каби бошқа собиқ президентларнинг Оқ уйни тарк этганидан сўнг йиққан юзлаб миллион доллар маблағлари ва кенг кўламли лойиҳаларидан кескин фарқ қилади.

Трамп ҳам ухлаб қолмоқда

Байденнинг касаллиги муҳокама қилинаётган бир пайтда, Демократик партия вакиллари ҳозирги президент Доналд Трампнинг соғлиғига ҳам эътибор қаратиш кераклигини айтмоқда. Демократик Миллий қўмитанинг собиқ раиси Жейми Харрисон 80 ёшли Трампнинг йиғилишлар вақтида ухлаб қолаётганини таъкидлаган.

Маълум қилинишича, Трамп 2025 йилнинг апрелидан буён қўлларидаги кўкаришлар ва оёқларидаги шишлар сабабли Уолтер Рид номидаги миллий ҳарбий тиббиёт марказига уч марта ташриф буюрган ва уни 22 нафар шифокор кўрикдан ўтказган. Бироқ, Оқ уй маъмурияти Трампнинг соғлиғи аъло даражада экани ва шишлар қон айланиши билан боғлиқ одатий ҳолатлигини таъкидлаб келмоқда.