«British Petroleum» Устюртда нефт-газ қидиради

Британиянинг «BP» энергетика компанияси Ўзбекистоннинг Устюрт минтақасидаги нефт ва газ қидирув ишларида иштирок этади. Бу ҳақда Украинанинг «Open4business» ва «Fixygen» ахборот порталларига таяниб, «Дунё» ахборот агентлиги хабар берди.

Маълум қилинишича, компания маҳсулотни тақсимлашга оид битим доирасида олтита қидирув блокини қамраб олувчи лойиҳанинг 40 фоиз улушини сотиб олган.

Ушбу лойиҳа ҳудуддаги углеводород захираларини аниқлаш ва уларни келгусида ўзлаштириш имкониятларини баҳолашга қаратилган.

Қайд этилишича, мазкур келишув сўнгги йилларда асосий эътиборни қайта тикланувчи энергия манбаларига қаратиб келаётган «BP» компаниясининг анъанавий энергетика соҳасига фаол қайтаётганини англатади.

Стратегиядаги ўзгаришлар

2021 йилда «BP» собиқ бош директори Бернард Луни раҳбарлигида «яшил» энергетикага ўтиш стратегиясини эълон қилиб, нефт ва газ соҳасидаги қатор лойиҳаларни қисқартириш режасини билдирган эди.

Ўшанда компания 2030 йилга қадар нефт ва газ қазиб олиш ҳажмини сезиларли даражада камайтириш ниятида эканини маълум қилган.

Бироқ кейинроқ «BP» ўз стратегиясини қайта кўриб чиқди ва яна анъанавий қазиб олинадиган ёқилғи лойиҳаларига асосий эътиборни қарата бошлади.

Устюртнинг аҳамияти

Компания вакили Жо Кристофолининг таъкидлашича, Ўзбекистон углеводород ресурслари бўйича катта салоҳиятга эга мамлакат ҳисобланади.

Устюрт минтақасидаги лойиҳада иштирок этиш мамлакатнинг нефт ва газ ресурсларини қидириш ҳамда ўзлаштириш жараёнларини қўллаб-қувватлаш имконини беради.