CNN Трампни Россияга нисбатан санкциялар жорий этишга мажбур қилган воқеани маълум қилди

CNN манбаларига кўра, АҚШ президенти Доналд Трамп Россияга нисбатан қатъийроқ чоралар кўриш ҳақидаги қарорни қисқа вақт ичида қабул қилган. Ҳатто Оқ уйнинг ўзида ҳам қарор тезлиги кўпчиликни ҳайратга солган. Трамп бир неча ойдан буён маслаҳатчиларига «бир куни Москвага нисбатан қатъийроқ йўл тутиш вақти келади», деб айтиб келгани маълум қилинди.

Манбаларнинг таъкидлашича, Трамп бу қарорни ўз «инстинктлари» асосида қабул қилган ва «Путин билан муносабатларда йўналишни ўзгартириш вақти келди» деб ҳисоблаган.

CNNʼнинг хабар қилишича, 22 октябр куни эрталаб Россия қўшинлари Харкивдаги болалар боғчасига дрон билан ҳужум қилган. Видеоларда одамлар болаларини қўлларига олиб, ёнғин исканжасидаги бинодан қочаётгани акс этган. Бу ҳодиса Трампнинг қарор қабул қилишида ҳал қилувчи бурилиш нуқтаси бўлган.

Оқ уйдаги манбалар айтишича, Трамп Ғазодаги вазиятни ҳам эслаб, «қаттъийроқ чоралар самара берганини» таъкидлаган. Бир юқори лавозимли амалдор сўзларига кўра, президентнинг фикри шундай бўлган: «Қатъиятлилик ҳаракатга олиб келади».

Шу билан бирга, Трампга сенатор Линдси Грэҳэм ва Сенатдаги кўпчилик етакчиси Жон Тюн ҳам босим ўтказган. Улар президентни Россияга нисбатан тезроқ санкциялар жорий этишга чақирган, бу орқали Владимир Путинни музокара столига ўтказиш мумкинлигини таъкидлаган.

«Биз президент ва унинг жамоасига қўллаб-қувватлов билдириб, урушни тугатиш йўлидаги саъй-ҳаракатларни жадаллаштиришни хоҳлаймиз», — деган сенатор Тюн.

Трамп санкциялар ҳақидаги ғояни яна январда, Оқ уйга қайта келган пайтда ўйлай бошлаган, бироқ у пайтда Путинни музокаралардан чўчитишдан хавотирланган эди. Аммо Украинадаги фуқаролик объектларига қилинган янги ҳужумлардан сўнг президент ўз қарорини ўзгартирди ва жавоб чораларини тезкор қабул қилди.