Илон Маск «Америка» партиясини тузишини эълон қилди

Маск бу қарорни ижтимоий тармоқда ўтказилган сўров натижаларига таяниб қабул қилганини таъкидлади. Унинг айтишича, 1,3 млн нафар иштирокчи сўровда овоз берган бўлиб, 65,4 фоизи янги партия тузилишини қўллаб-қувватлаган. «Биз бир партияли тизимда эмас, ҳақиқий демократияда яшашни хоҳлаймиз. Шу боис партиямиз сизнинг эркинлигингизни қайтариш учун тузилди», — деди Маск. Унинг режасига кўра, «Америка» партияси 2026 йилдаги оралик сайловларда иштирок этиб, Сенатда 2–3 ўрин ва Конгрессда 8–10 ўринни эгаллашга интилади. Маск буни «қонун лойиҳаларини тўсиб қўя оладиган қудратли гуруҳ» сифатида баҳолади. Маск ушбу ҳаракатни АҚШ президенти Доналд Трамп билан зиддият ортидан бошлади. Трампнинг 5 трлн долларлик давлат қарзини ошириш ва солиқ имтиёзларини кенгайтиришни кўзда тутган қонуни қабул қилинганидан сўнг Маск уни очиқ танқид қилди. У бу қонун мамлакат бюджетини 2,5 трлн доллар дефицитга учратади, деб ҳисобламоқда. Маск аввал Трампнинг сайловолди кампанияси учун 250 млн доллардан ортиқ маблағ сарфлаган ва ҳукумат самарадорлиги департаментини бошқарган эди. Аммо Трамп электромобиллар учун субсидиялар ва қайта тикланувчи энергетикага имтиёзларни рад этганидан сўнг уларнинг муносабатлари кескин ёмонлашди. Ижтимоий тармоқлардаги очиқ тортишувлар давомида Трамп Маскнинг компанияларига берилаётган давлат контрактлари ва субсидияларни қайта кўриб чиқиш билан таҳдид қилди. Маск эса ўз навбатида Трампни ёшлар эксплуатацияси билан боғлиқ можароларда айблашга уринди, аммо кейин кечирим сўраб, айрим постларидан афсусдалигини билдирди. Bloomberg маълумотига кўра, шу зиддиятлар туфайли Маскнинг бойлиги 34 млрд долларга камайган.