Илон Маск IPO арафасида «SpaceX» акцияларини 1,4 млрд долларга сотиб олди

Илон Маск ўзининг аэрокосмик компанияси «SpaceX»даги улушини ошириш мақсадида 1,4 млрд доллар сарфлаб, амалдаги ва собиқ ходимлардан акцияларни қайтариб сотиб олган, деб хабар беради «Reuters».

Харид бўйича маълумотлар

«SpaceX» акцияларини иккилламчи бозорда сотиб олиш ҳақидаги маълумот компаниянинг махфий IPO проспекти лойиҳасида очиқланган, деб хабар беради «Reuters». Кутилаётган Уолл-стрит листинги доирасида компания тахминан 1,75 трлн долларга баҳоланиши ва 75 млрд долларгача маблағ жалб қилиши мумкин. Бу эса жойлаштиришни тарихдаги энг йирикларидан бирига айлантириши эҳтимолдан ҳоли эмас.

Шунингдек, «The Information» маълумотига кўра, «SpaceX» рағбатлантириш режасини тасдиқлаган бўлиб, унга мувофиқ Илон Маск компания бозор қиймати 6,6 трлн долларга етганда ва сунъий интеллект учун орбитал дата-марказлар лойиҳаси амалга оширилганда қўшимча 60 млн акция олади.

Бу акциялар ҳар сафар бозор қиймати 500 млрд долларга ошганда босқичма-босқич берилади. Илон Маскнинг компаниядаги ўтган йилги маоши 54 080 доллар бўлгани ҳам «Reuters» томонидан қайд этилган.

IPO аризасидан яна нималар маълум бўлди?

«SpaceX» IPO тузилмасини шундай шакллантирмоқдаки, у Илон Маскнинг компания устидан назоратини сақлаб қолади. «Reuters» маълумотига кўра, икки синфли акциялар тизими жорий этилади: ҳар бири 10 та овозга эга «B» синф акциялари асосан компания эгаси ва инсайдерлар қўлида бўлади, инвесторлар эса битта овозга эга «A» синф акцияларини олади.

Ҳужжатларда, шунингдек, акциядорларнинг директорлар кенгаши сайловларига таъсир қилиш ёки айрим суд даъволарини киритиш имкониятларини чекловчи қоидалар ҳам мавжуд. Илон Маск компанияда бош директор ва техник директор лавозимларида қолади, шунингдек, тўққиз кишидан иборат директорлар кенгашига раҳбарлик қилади.

Ҳужжатлар компаниянинг молиявий ҳолатига ҳам ойдинлик киритади, айниқса ракеталар бизнеси «xAI» билан бирлаштирилгандан кейинги даврда. Бирлашган тузилма 2025-йилни тахминан 24,8 млрд доллар нақд маблағ, 92 млрд доллар актив ва 50,8 млрд доллар мажбуриятлар билан якунлаган.

«SpaceX» 4,94 млрд доллар зарар кўрган (олдинги йилда 791 млн доллар фойда бўлган). Бу, асосан, сўнгги икки йилда капитал харажатларнинг қарийб беш баравар ошгани билан боғлиқ бўлиб, уларнинг ярмидан кўпи сунъий интеллектга сарфланган.

Шу билан бирга, компания даромади 14,02 млрд доллардан 18,67 млрд долларгача ўсган. Харажатларнинг катта қисми «Starlink» сунъий йўлдош интернет бизнеси ҳисобидан молиялаштирилган: у 4,42 млрд доллар операцион фойда келтирган, бироқ умумий капитал харажатларнинг тўртдан биридан кам қисмини ташкил этган.