Илон Маск ва Жефф Безос Ўзбекистонга келиши мумкин

2028 йилда Самарқандда ўтказиладиган Халқаро астронавтика конгрессига «SpaceX» асосчиси Илон Маск ва «Amazon» асосчиси ҳамда «Blue Origin» аэрокосмик компанияси эгаси Жефф Безос келиши мумкин. Бу ҳақда «Ўзбеккосмос» агентлиги директорининг ўринбосари Муҳиддин Иброҳимов «Ўзбекистон 24» телеканалига берган интервьюсида маълум қилди.

«Ҳаракат қиламиз. Федерацияни раҳбари ҳам бир қизиқ гап айтгандилар, агар Ўзбекистонга жаноб Маск келишининг бир сабаби бўладиган бўлса, бу конгресс [Халқаро астронавтика конгресси] бўлиши мумкин деб ҳазил қилгандилар. Ҳаммага таклифнома жўнатамиз, нафақат жаноб Маск, «Amazon» асосчиси жаноб Безос бор. Дунёдаги бошқа жуда ҳам ёрқин шахслар бор космик соҳадаги. Ҳаммасини таклиф қиламиз», — деди Муҳиддин Иброҳимов.

«Коинот олимпиадаси»

Халқаро астронавтика конгресси (IAC) — коинот саноатидаги дунёнинг энг йирик ва нуфузли тадбиридир. Уни ҳар йили «Халқаро астронавтика федерацияси» (IAF) ташкил қилади. Уни кўпинча «Коинот олимпиадаси» деб ҳам аташади, чунки у ерда «NASA», «SpaceX», «Blue Origin», «Roskosmos» ва бошқа йирик ташкилотлар ўзларининг янги лойиҳаларини тақдим этади.

2028 йилда ушбу конгресснинг Самарқандда ўтказилиши ҳақидаги қарор 2025 йил октябр ойида Сиднейда (Австралия) бўлиб ўтган «IAC-2025» тадбирида қабул қилинди. Ўзбекистон бу ҳуқуқни қўлга киритиш учун Ҳиндистон ва Баҳрайн каби кучли номзодлар билан рақобатлашди. Бу Марказий Осиё тарихида биринчи марта бундай даражадаги коинот форумининг ўтказилиши бўлади.

Илон Маск онасининг Ўзбекистонга ташрифи

Илон Маскнинг онаси Мей Маск 2024 йил феврал ойида Ўзбекистонга ташриф буюрган эди. Мей Маск Тошкентда ўзининг китоби тақдимотини ўтказган. У ўзининг ижтимоий тармоқларида Ўзбекистоннинг меҳмондўстлиги ва Самарқанднинг тарихий обидалари ҳақида жуда ижобий фикрлар қолдирган.

Айнан 2028 йилда Ўзбекистон ўзининг биринчи миллий илмий сунъий йўлдоши — «Мирзо Улуғбек»ни (6U CubeSat) коинотга учиришни режалаштирмоқда.